Nunna Hlu Bik A Awm Em? Black Lives Matter Vs All Lives Matter

Khawvel letliam daiha thil thleng pawh ni se a thlen lai la lain kan lo hmu zung zung thei a, kan titi a luah ve nghal a, kan khawtlang nun thlengin engtin emaw tak tal min nghawng ve thuai ṭhin. A bik takin kan raltiang ram United States vela an boruak chu kan ngaihven zualin a lang a, an chanchin leh an thil tawn ang phei chu kan lo hre ve zung zung zel a nih hi. 

Chu kan ral khat ngaihzawng, khawvel ram ropui ber nia kan ngaih ngheh em em mai United States-a tunhnaia boruak lian ber chu Black Lives Matter Movement leh a chhehvel boruak hi a ni a, keini pawhin kan ngaihvenin kan tuipui ve hle a ni.

Black Lives Matter tih chu mi dumte nunna hi a hlu a ni tihna a ni mai a. Social media auhla leh mi dumte nunna hian hlutna a nei ve a ni tih lantir tura civil disobedience movement chi khat a ni a, chi leh chi inenhranna dona tura tunhnaia hmalakna lian tham ber a ni.

Black Lives Matter tih kan sawi chuan All Lives Matter tih a lo lang ve nghal bawk a. Mi dumte nunna chauh hian hlutna a nei a ni bik lo a, tu nunna pawh mai hi a hlu ve vek tho e tih auhla a ni ve leh thung a ni.

Read More: AOC - US Thenhrangtu Nula Chu

Black Lives Matter

Kum 2012 February ni 26 tlai lam khan Sanford, Florida-ah mi dum tleirawl pakhat Trayvon Martin chu George Zimmerman chuan a kap hlum a. Zimmerman hi tualthah thubuaiah man ni mah se mahni invenna tura that palh ni-a a insawi avangin September, 2012-ah thiam chantir a ni a. Chu thiam chantirna chu Zimmerman te tan lawmawm viau mah se mi tam tak tan erawh lawm lohna tur hlir a ni ber. A thah tak kha mi dum tleirawl a nih avang chauha Zimmerman chu thiam chantir niin tam takin an ngai a, rorelna hmaah meuh pawh mi dum nunna chuan hlutna a nei loah ngaiin social media hrang hrangah #BlackLivesMatter hashtag hman lar chhoh a ni ta a ni.

Hemi hnu hian mi dum tual thihna hrang hrangah hman chhoh zui zel a ni a. Kum 2014-a mi dum pahnih, Michael Brown leh Eric Garner te Police laka an tual thihna avanga Street demonstration Ferguson leh New York khawlaia neih a nih hnu phei chuan ram pum huap angin Black Lives Matter movement hi a alh chhuak tawh a ni.

United States chhung ringawt ni lo, khawvel pum anga thawm a neihna chu kumin, 2020-a mi dum pakhat George Flyod Minneapolis Police officer laka a tual thih leh avanga dodalna aṭangin a ni a. Khawvel hmun hrang hrang aṭangin thlawp pawh a hlawh em em a, infiamna tual zawl thlengin Black Lives Matter protest hi neih a ni chho ta zut a ni.

Black Lives Matter hian a tum ber chu chi inthliarna do a ni a, a bikin United States-ah police kuta mi dum an boral fo bik mai chu dodal ngaiin an hria a, hmanah sal an nih lai aṭanga an nunna hi a hlut loh bik riau ṭhin ang tho khan tunlai khawvelah meuh pawh hian a la hlu lo bik em em mai hi a dik lo, chuvang chuan mi dumte nunna hian hlutna a nei ve tho a ni tih tarlan an tum a ni ber.

Read More: K. Hminga Mihrinna

All Lives Matter

Black Lives Matter slogan a lar tak hluai hnuah chuan mi ṭhenkhatin, mi dum nunna hian hlutna a nei a ni tih bik ringawt hi a dik lo, mi dum nunna chauh ni loin mi zawng zawng nunna hi a hlu vek a ni tih lantirna atan All Lives Matter slogan kum 2016 vel aṭangin an rawn aupui ve a. Republican senator Tim Scott chu a hmang hmasa pawl a ni a, politician hrang hrang(a bikin Republican lam), infiammi leh mi lar ṭhenkhat pawhin an thlawp be bawk.

All Lives Matter slogan hi a nihna takah chuan Black Lives Matter movement do letna tur atana tihchhuah a ni a. Senator Rand Paul phei chuan 'Black Lives Matter movement hian an tum a ṭhelh hulhual a ni' a ti hial.

Black Lives Matter Vs All Lives Matter

Read More: Isua Ang Lo Turin

Black Lives Matter chu mi dum nunna hi a hlu ve tho a ni tihna a ni a, All Lives Matter chuan mi dum nunna chauh ni loin mi zawng zawng nunna hi a hlu a ni a ti thung a. Han ngaihtuah thuak chuan All Lives Matter an tih hi thil tih dan tur zawk leh nih dan tur zawk a nih hmel viau a, Black Lives Matter movement hi a uchuak deuh hlek a ni tih ve mai pawh awl tak tur a ni. 

Mahse uluk deuh leh chik zawka ngaihtuah erawh chu a ngai thung. Mi zawng zawng nunna hian hlutna a nei vek tih hi sawi nawn leh chuan ngai tawh lo tur khawpa thu dik awm sa a ni a. Chutiang a nih lai erawh chuan khawvelah hian rah beha awm leh awp beha awm, hnuaichhiah leh dinhmun hnuaihnung taka awm hi eng emaw zat an awm a. Bawih neih hun laiah phei kha chuan bawihte kha mihring pangngai angah ngai an ni ngai lem lo a, an nunna pawh ran nunna aia a hlut bikna a awm chuang lo. A neituin an duh huna an tihhlum mai theih leh tihlumtu pawh tualthat anga ngaih ngai lo a ni hial ṭhin. Chutiang tuar nasa ber chu mi dum kan tihte hi an ni a. American history kan en chuan chu chu chiang takin kan hmu thei ang. 

Chutianga kha leh chen nunna hlut hlawh ve lo khan All Lives Matter tih kha an zawm pha lo a. Mi zawng zawng nunna hi intluk tlang anga en a nih ngai loh avang leh an nun chu hlut loh bik a nih tlat avangin mi zawng zawng nunna hi a hlu teh meuh mai a, mahse kan nunna hi hlut a hlawh loh bik zel avangin kan nunna hian hlutna a nei ve tho e tiin an rawn au chhuak a ni. 

Read More: Mizo Novel 3 - C. Lalnunchanga Kutchhuakte

Critical race theory professor David Theo Goldberg chuan 'All Lives Matter hian chi inthliarna hi a awm lohah a ngai a, hetiang tuar bik hi an awm loah a ngai' tiin a sawi a. All Lives Matter chuan nunna zawng zawng hi rah behah a ngai a, mahse a ni lo. Nunna a hlu vek tih hi dik mah se nunna zawng zawng hian hlut an hlawh vek loh avangin hlut hlawh loh bik nunna chuan hlut hlawh ve tumin Black Lives Matter an rawn ti a ni. Chutiang a nih laia lo dodal a, All Lives Matter lo tih ve sek kha awmzia a nei lem lo a ni. 

Isua kha hnehchhiaha awmte tan a ding ṭhin a, rah beha awmte chhan chhuak turin a bei ṭhin. Mi sualte ṭhian a ni a, a rawngbawlna hmuna a zirtirte pawh mi hnuaihnung te te vek an ni. Chu Isua chu vawiinah hian kan zingah lo kal leh ta se, tu lamah nge a ṭan ang? Retheite, pachhiate, hnehchhiah leh bawih, riangvaite Lal leh Pathian kha a nih tlat avangin mi hnuaihnung leh an nunna pawh hlutna nei lo ang hiala ngaihte tan hian a ding chhuak leh ngei ang!

Read More: Kan Khaw Thlanmual

He article hi ngaihnawm i ti a, i hlawkpui emaw i ṭangkaipui emaw a nih chuan blog hi subscribe ve la, article ṭangkai leh ngaihnawm tak tak i lo hmu ve zel dawn nia.