Mizo Novel 3 - C. Lalnunchanga Kutchhuakte

Mizo Novel 3 kan sawi tur hi ṭhenkhat chuan Mizo novel zinga a ṭha ber pawlah an ngai maithei a, Mizo novel chhiar ṭhin chuan kan chhiar vek tawh hial ang. Heng Mizo novel 3 kan sawi tur hi mi pakhat kutchhuak a ni a, a mal mal pawha sawi fe tham ṭhiau an ni. Tunah erawh chuan mi pakhat kutchhuak a nihna leh Mizo novel zinga mi chhiar hlawh leh ṭha ber zinga mi a nih angin khaikhinna leh sawi zauna tawite neih kan tum dawn a ni.

Mizo novel chhuak tawh zingah a ṭha ber thlang dawn ta ila mi tam takin kan thlan ṭhum tur Pasalṭhate Ni Hnuhnung, Ruamrai Thuruk leh Kawlkil Piah Lamtluang te hi C. Lalnunchanga kutchhuak an ni a. Tuna kan sawi bakah hian Pasalṭhate Ni Hnuhnung prequel Ka Mi Huaisen leh Ka Pasalṭha a ziak bawk. Heng novel ngaihnawm tak tak pathum zinga pahnih Pasalṭhate Ni Hnuhnung(2006) leh Kawlkil Piah Lamtluang(2015) te hi an chhuah kum ve veah Mizo Academy of Letters(MAL) chuan Mizo ṭawng lehkhabu chhuak zinga ṭha ber(Book of the Year)-ah a thlang nghe nghe a ni.

Read More: Mizo Kutchhuak Poetry Bu Hrang Hrang Thlirna

Pasalṭhate Ni Hnuhnung

Pasalṭhate Ni Hnuhnung hi historical novel a ni a, Mizo chanchina pawimawh tak saphoin min awp tura beihpui an lo thlak laia kan lal leh pasaṭha huaisen ten an lo beihlet dan chanchin vel a ni a. History-a a tak taka thleng ngei behchhana ziah a nih avangin belhchian a dawl a, phuahchawp thawnthu ni mah se facts leh kum lo langte hi a rintlak tawk viau bawk a, Mizo history zir nan pawh a ṭha viau.

Kum 2006-a tihchhuah lehkhabu hi phek 348 laia chhah a ni a, vawiin thleng hian vawi 3 vel chhut nawn a ni tawh nghe nghe a, cheng 300 man chauh a ni. Sawi tawh ang khan kum 2006-a Mizo ṭawng lehkhabu chhuak zinga ṭha ber, Book of the Year-ah thlan a ni a, a phu hle bawk.

A thawnthu tlangpuiah chuan Sailo lal huaisen Puilura leh a khuate chanchin a lang ber a. Ṭhen khatnaah Zawlsang ram inchuha Sangburha khuate nen an indo dan leh a tawpah pasalṭhate inmalbeih dan hmuhnawm(?) em em mai hmanga hnehna an chanzui tak dan a lang a. Ṭhen hnihnaah chuan vailianin Mizo lalte awlsam taka an palzut mai mai nia kan ngaih ṭhin ang kha a lo ni lo a. Lal dang tam tak leh Puilura te ngei pawhin zalenna hum tuma an lo beih dan, Sappui mingo tia kan chungen em em pawh an tihluhai map dan te, chak lo zawk ni mah se hneha an awm bik lohzia thiam takin tarlan a ni.

Read More: Mobile Application Tangkai - Hman Ngei Ngei Tur

He thawnthu hi Mizo nunhlui leh pasaṭhate chanchina innghat a ni a, a thawnthu pum mai hi pasalṭhate hlimthlain a luah a. Tin, Mizo pi pute nun leh khawtlang inrelbawl dan kha sapho pawhin an chungen hial khawpa changkang leh ropui a ni tih thiam taka lantir a ni bawk.

Thawnthua a changtu langsar deuh deuhte chu:

1. Nghalṭhianga: Pasalṭha chingkim, khawtlang thlamuanna leh khawtlang chhan fotu. A changtupa ber, a hnua lal fanu nuthlawi nei a,   belrawhmual kila khawper ṭhut zui ta.

2. Puilura: Khiangzo Lal a ni a, lal ropui tak ni mah se Sailo zi ding dik tak a nih loh avanga sailo lal dangin an pawm vak loh. Sapho pawhin an tlawm theih loh, thinlung nghing ngai lo a ni.

3. Saingura: Puilura fapa, apa mingo kuta a boral hnua lal ni zui ta, a hnuk chah rak thlenga mingo dotu. Lal ni mah se pasalṭha thei ber pawl a ni.

Pasalṭhate Ni Hnuhnung hi post colonial literature huanga seng luh theih tur a ni a. A ziaktu pa ngeiin thuhmahruaiah '...Kan pipute chu hnam changkang lo lutuk, khawtlang inawpna leh dan leh hrai pawh nei mumal lo, zawng u ang chauhva ramhnuaia tal ve mai mai ang lekin kan chhuah a... Chuvangin, kan pi pute kha an khawsak hniam mah se, hnam changkang lo leh dawihzep an ni lo tih ṭhangthar zelte hriat tura ziaka dah hi ṭulin ka hria a...' tiin a ziak nghe nghe.

Read More: Mizo Hla Thar

Ruam Rai Thuruk

Kum 2007-a tihchhuah Ruam Rai Thuruk hi Mizo novel-ah chuan boruak nei lian ber pawl a ni hial ang. Inthawina leh a kaihhnawih neuh neuhte a lan avanga Synod Bookroom lamin an zawrh duh loh ang hiala sawi kha a ni bawk a. Mi tam takin C. Lalnunchanga master piece ang hialin an sawi a, ngaihnawm lo thei a ni lo! 

Phek 470 zeta chhah a ni a, cheng 150 man chauh a ni! A kawm hnung lama Hmangaihna, Huatna, Inphiarna rapthlak tih lang hian a thawnthu chu a fun kim thawkhat viau a ni. 

A thawnthu hi kum 1984 vela innghat a ni a, mahse rambuai buai zualpui lai hun angah te pawh kan let leh zak zak bawk. Bawkpui khua leh a chhehvel, thuruk mak tak paitu ruam rai leh Aizawlah te a vir kual vel a. Nula leh tlangval inkara hmangaihna boruak chu a thawnthu laimu ber ni mah se ruam rai hmuna thuruk chu a thawnthu innghahna ber a ni bawk si! 

He novel hi love story lungchhiatthlak tak a ni nain setana biakna chungchang te nen a inphiarzawn chiat a, Mizo thingtlang nun tarlanna a nih rualin UT hunlai vela Aizawl boruak, a bikin ṭhalaite nun a lang fiah em em bawk. Tin, rambuai boruak thiam taka phum a nihna hian a buk a tirit zual bawk ang. 
He novel sawina atan chuan a kawm hnunga thuziak hi a ṭha ber ang.

'Hmangaihte chunga chet nan chuan a va rawng em! Hmana khawlohna thlarau chuan thla a la zar reng mai! Thuruk chu char a ni a. A hawng turin hla tak aṭangin a ṭhiante thlarau chuan an ko em ni? He hmunah hian mi pangngai thisen kal lai chu a chawl a, hlauvin an khur ṭhin asin. Nula hmelṭha tak pawh ni se, thikthu hi a ni rapthlak taka chettirtu. Phuba lak nan chhan a thlarau pawh a hralh ang a, he tlukna ruamah hian a pen lut ang. Kir leh theih a ni lo. Mahse, a hmangaih chu a uai ding zo ang em? Hmangaihna hi ṭahna mai em ni?'

Thawnthua a changtu langsar deuh deuhte chu:

1. Tluanga: Bawkpui CDPO a ni a, Aizawl tlangval ni mah se pasalṭha rilru pu tlat a ni. Thawnthua mi pawimawh ber a ni hial ang. 

2. Selina: Tluanga nena tleirawl lai aṭanga inngaizawng an ni a, intheihnghilh thei lo tawn ve ve an ni. Eng emaw avangin inṭhen zuai mah se, mi dang laka fa a neih hnuah Bawkpui doctor niin Tluanga hmangaihna dawng lehtu, mi vannei a ni! 

3. Puii: Zokawn nula hmelṭha a ni a, Tluanga a bo, lo let leh lo mikhualtu an ni a, Tluanga nen innei zui mah se ruam rai thuruk avanga pawh ṭhen an ni a, mi vanduai a ni! 

4. Rosangi: Puii phirpui a ni a, ruam rai thlarau ko chhuak lehtu a ni bawk! 

5. Saia: Tluanga ṭhianpa leh Aizawl tlangval to a ni a, phuba lakna tuartu a ni. 

6. Tumvuaia: Puii leh Rosangi te pu leh pa. Ruam rai thuruk bulṭantu chu. 

Read More: Covid-19 Vaccine[in Mizo]

Kawlkil Piah Lamtluang 

C. Lalnunchanga novel thar ber hi kum 2015-a tihchhuah a ni a, Mizo novel-a kan hmuh tam lem loh fantasy novel huanga seng luh theih tur a ni. Kan sawi tak pahnih ang lo takin a changtupain a chanchin a sawina angin ziah a ni a, kan khawvel awm sa leh hriat sa ni lo, khawvel thar hlak dinin chutah chuan min zinpui a. Indona leh buaina karah kawlkil piah lamtluang chu min zawhpui a, a chhiartu apiang chu lunglenna rauin nghet takin min man chat vek hial ang. 

Phek 502 zeta chhah lehkhabu hi kum 15 chhung vel ziah nan hun hman a ni a. Kum 2015-a Mizo ṭawng lehkhabu chhuak zinga ṭha ber Book of the Year-ah thlan a ni nghe nghe. A man hi cheng 350 a ni. 

A thawnthu hi thingtlang khaw pakhata sorkar hnathawkin a chanchin leh a ṭhenawmpa, rual pawl lo zet Pu Vala chungchang a sawi aṭangin a inṭan a. Pu Vala'n a kal bo hmaa a hnutchhiah, a thil tawn mak tak tak a ziahna min chhiarpui a, chuta ṭang chuan Pu Vala hmangaih leh phatsantu Muanteii thinlung neih let lehna tur leh phuba lakna turin zalenna suala rammutna hmunah te zawlaidi kan zawng a. A hnuah phei chuan lei mihring la dai pawh ngai loh khawvel thar(?), tuilet hnu lawka lak hran ni ta khawvel mak tak, afrid te khawvelah lung dum, sayya-stone zawngin kan pen lut ta a. 

Lung dum an tih chu hmangaihna vantirhkoh afrovie thlarau tanna a ni a. Chumi neitu chuan khawvel a thunun thei dawn a. Lal ropui Emperor Angka chuan a thlarau leh afrovie thlarau chu suih zawm a lo tum ve mek a, khawvel dang aṭanga lo kal Vala, Lord Valha ni ta leh a ṭhiante chuan an chang thei ang em? Hun rei tak zinkawng a lo zawhpui tawh ngei ngei pawh chuan a phatsan leh mai ang em? A pawimawh berah chuan nun ruak hnawh khahna zawnga khawvel dang aṭanga pen lut hial Vala(Valha) chuan a zawn chu a hmu ang em? Tin, eng nge a zawn tak chu ni reng reng? Zawlaidi emaw lung dum emaw chauh zawnga chu chen chen vak chu a ni ang em? Lung dum chu lo nei thei ta tehreng pawh ni se a nun ruak chu hnawh khah a ni ang em? 

C. Lalnunchanga hian pasalṭhate nun leh an chanchin hi a lawm viau niin a lang a. A novel reng rengah hian a changtu ber chu pasalṭha thei tak emaw, pasalṭha thinlung vawng tlattu emaw a ni ngei ngei a. Kawlkil Piah Lamtluangah hian chu a pasalṭha ngaihzawnna thinlung chu dip daltu leh bawh buaitu awm lem loin a hrithla ta a tih theih a. Duh tawka pasalṭha a chet theih nan khawvel thar a duang ti pawhin a sawi theih ang. 

He novel hi khawvel huap ang pawhin novel ṭha ber pawl zingah a tel theiin a rinawm a. Hollywood lam director thiam tak takin budget pui tak nen movie te han siam se hit viau thei tur ni tein a hriat a. Mahse heng ngaih dan erawh hi chu ṭhenkhat chuan lutuk an ti maithei. Hnial rual loh erawh chu kan novel neih tawh zawng zawng zinga class ber pawl a ni tih hi a ni. 

Read More: Kawlkil Piah Lamtluangah Zawlaidi - Natalia

Kawlkil Piah Lamtluang-a changtu langsar zualte chu:

1. Vala: Zalenna suala rammu, a ṭhiante an lo haw hnu daiha lo haw ve chauh a ni a. Thawnthua a changtu ber leh a sawitu ni bawk a ni. Khawvel thar a daina hmunah chuan Lord Valha tih a ni a, hriak thih pasalṭha a ni. 

2. Zetebeli: Dawithiam a ni a, pasalṭha thei tak lo lan hun nghak ṭang ṭangtu leh a tawp thlenga Valha zin kawng zawhpuitu a ni. 

3. Balthora: A tirag chuan sal awm ṭha duh lo a ni a, Valha'n lei chhuakin a kut vei lam ni zui ta a ni. 

4. Natalia: Thawnthuah hian a lang rei lo khawp mai a, mahse hmun pawimawh tak changtu a ni lawi si. Pasal sun tawh, nuthlawi ngaihnobei a ni a, Valha nupui a ni zuai a, pasalṭha nun khawhar hnemtu awm chhun ni mah se a nung rei lo. 

Heng Mizo novel 3 kan sawite hi khum theitu a awm chuang lo ang tih tur khawpa novel ṭha leh ngaihnawm an ni vek a. Pakhat chauh thlan chhuah tur ni se thlan tur ber hriat harsa khawp a ni bawk. Mi mal ngaih dan sawi dawn ta ila chuan Kawlkil Piah Lamtluang hi ka thlan tur a ni maithei. Eng ber hi nge i thlan ve dawn han comment teh le.

Read More: Zuahliana Thawnthu

He article hi i hlawkpui emaw i ṭangkaipui emaw a nih chuan khawngaih takin blog hi min subscribe sak ve la, article ṭangkai leh ngaihnawm tak tak i lo hmu ve zel dawn a nia.