Covid-19 Vaccine[in Mizo]

Covid 19 vaccine awm hun tur leh hman theih a nih hun tur hi tunlaia mi tam ber hriat chak leh ngaihven a ni a. Khawvel hmun hrang hrang atanga internet hmanga an zawn nasat ber ber pawh covid-19 vaccine update tih te, covid-19 vaccine progress tih te a ni. Covid-19 vaccine a awm tawh leh tawh loh pawh ‘Is there a vaccine for coronavirus disease?’ tiin an inzawt deuh luai luai mai a ni. Covid-19 vei an pun thur thur lai leh thihpui pawh an tam telh telh a, chhiatna dang thleng chanchin kan hriat mawlh mawlh lai hian chanchin thar lawmawm kan beisei chu covid-19 vaccine siamna kawnga hmasawnna chungchang te a ni ber rih a. Covid-10 vaccine chungchanga kan hriat ve awm leh thil pawimawh deuh deuh te sawi kan tum dawn a ni.

Contents

1. What is Vaccine?
2. Engtin nge Vaccine an siam?
3. Vaccine enchhin a nih dan
4. Covid-19 Vaccine
5. Covid-19 Vaccine: Eng hunah nge?
6. Covid-19 Vaccine: Price?
7. Covid-19 Vaccine dang
8. Reference

Read More: Toonlaini Tuned-In

What is Vaccine?

Vaccine tih hi Mizo tawng chuan eng hri emaw laka invenna damdawi tihna a ni a. Eng hri emaw, eng natna emaw laka taksa a lo himna tur leh kha hriin hna a thawh theih lohna tura taksaa raldo sipaite tihchakna damdawi a ni ber a, kha hri leh natna kha taksaah lo lut mah se pawi an khawih theih tawh lohna tura taksa lo buatsaihtu a ni. Vaccine hi chi hnih a awm a, nakina taksaa natna hrik lo lut thei tur lo veng lawktu prophylactic leh natna awm sa dotu tur therapeutic te an ni.

Kum zabi 10-na velah daih tawh khan Chinese hoin vaccine hi an lo hmang tawh thin a. Chhinchhiah theih chinah chuan a hmang hmasa ber an ni. Kum 1960 chhoah khan surgeon tura inzir mek Edward Jenner chuan khang hun laia hri lar tak zawng hri(small pox) kha bawng vulhna hmuna thawkten an vei ve mang ngai lo tih a hria a. Hei hi a chhan chu heng hnathawktute hian cowpox an lo vei tawh vang a ni a, chu chu zawng hri kan tih khan a ngam loh vang a ni ber. Chu a chanchin hriat atang chuan zawng hri laka inven nan cowpox kha a tha ang tih ngaihdan a nei a, enchhinna te neiin zawng hri laka invenna chu a siam ta a. Khawthlang lama vaccine bultantu hmasa a ni.

Kum 1980 chhoah French scientist hmingthang Louis Pasteur chuan anthrax leh kawthalo laka invenna tur vaccine a siamchhuak a, heta tang hian second generation of vaccine a intan angah ngaih a ni. Kum zabi 19-na a lo thlen phei chuan vaccine chu thil pawimawh takah ngaih a lo ni chho a, ram hrang hrang pawhin an ram mipuite hriselna atana pawimawh berah an ngai ta a. Kum a liam a, thiamna lama hmasawnna a nasat ang zelin vaccine pawhin hma a sawn a. Hri chimawm tak Small pox chu leilung ata nuai bo niin, zeng hri(polio) te pawh a bo titih ta a, natna dang eng emaw zat hlauhawm lutuk lo tur khawpa khuahkhirh theih a ni ta a ni. Chutih rual chuan natna thenkhat vaccine erawh siam mai theih loh te pawh a awm ve bawk a, chung zingah chuan HIV te pawh hi a tel thei awm e.

Read More: Zuahliana Thawnthu

Engtinnge Vaccine an siam?

Vaccine reng rengah hian a tlangpui thuin an do tur natna thlentu microorganism kha a tel thin a, mahse tihhlum emaw tihchak loh deuh hnu a ni thung. Chumi chuan taksaa raldo sipaite kha a lo kai harh a, khatiang chi hrik a lo luh khan a hlauhawm a ni tih taksain a lo hre lawk a, a lo luh rual ruala lo bei nghalin an tihlum ta thin a ni. Vaccine-ah hian taksa raldo sipai tichak theitu tur a tel bawk a, chu chuan natna hrik an beihnaah a tichak zual ta em em thin a ni.

Vaccine siam dan hi chi hrang hrang a awm a. Natna thlentu hrik inthlahpung chak lutuk tur timuang tura siam te, natna thlentu hrik hnathawk thei lo hulhual tura siam leh tihlum tura siam te hi a tlanglawn pawl an ni a. Concept dang deuh hlek hmanga siam te pawh a awm thin tho bawk.

Vaccine enchhin a nih dan

Vaccine hi a siam chhuah ngawr ngawr pawh thil hautak tak a nih tawh laiin vaccine atana hman theih awm siam chhuah ringawt piah lamah hian a tak taka hman theih tur hian kawng a la thui viau a. Vaccine him tak leh hna thawk tha tak a nih theihna turin chhawng eng emaw zatah enchhin a ni thin. Heng enchhinna hrang hrang a paltlang loh chuan vaccine anga hman tlak a ni thei lo a ni.

A hmasa ber chu exploratory stage tih a ni a. Hemi stage-ah hian vaccine tur zawn chhuah/siam chhuah leh laboratory-ah a hrik do tur kha a do hneh dawn em tih enchhin a ni thin. A dawtah chuan pre clinical trial a awm leh a. Hemi trial-ah hi chuan laboratory-ah ramsa emaw ran emaw hmanga enchhin a ni. Pre clinical trial a paltlang hnu hian mihringah enchhin a ni tawh a, chu chu clinical trials tih a ni a, clinical trials pawh hi chhawng li(four phases)-ah neih leh thin a ni.

Clinical Trials Phase 1-ah chuan volunteer hrisel tha takah enchhin a ni a. Volunteer te hi group khatah mi 10 vel awm zelin group hnih emaw group thum emawah then an ni a. An hnenah chuan natna do hneh tura vaccine mamawh zat tlem thei ber hriat nan vaccine chu a tlem thei ang berin an pe a. A hnathawh dan a zirin an tidanglam leh thin. Clinical Trials Phase 1-ah hian mihring taksaa vaccine thawh dan te, side effect a neih dan te zirchian a ni.

Clinical Trials Phase 2-ah chuan a hmaa an enchhinna aia tam deuh zawk(mi za bawr vel)-ah enchhin leh a ni a. Mi tam zawka vaccine hnathawh dan leh vaccine pek hun a zira a hnathawh dante zirchian a ni. Clinical Trials Phase 2 a paltlang chuan mi tam lehzual zawkah enchhin leh a ni a, chu chu Clinical Trials Phase 3 tih a ni. Hetah hian vaccine chu a him ngei a ni tih leh tha takin hna a thawk thei ngei a ni tih finfiah tur a ni a. Chuta tang chuan pawmpui turin thuneitu lam hnenah thehluh tur a ni. Clinical Trials Phase 4-ah chuan vaccine hman a nih hnua a hnathawh dan te, a side effect leh hun rei zawka a that leh that lohte en a ni.

Read More: Zan Lalnu

Covid-19 vaccine

Kum 2019 tawp lama China atanga hri darh, khawvel pum min runtu coronavirus disease 2019 (COVID‑19) hi natna thar, a chanchin pawh hriat chian lutuk loh a ni a. Tunhmain he hri laka lo invenna tur vaccine a la awm ngai hek lo. Mahse khawvel pum min tihbuai tak em avangin ram hrang hrang atangin mithiam eng emaw zatin vaccine siam chhuah tumin an bei a. January ni 11, 2020-a Covid-19 genetic sequence an tar chhuah atang phei chuan zirchianna hi ngawrh taka neih a ni. July 2020 thleng hian covid-19 vaccine atana hman theih awm candidate 24 chu clinical trials nei tur emaw nei mek emaw a awm a. Heng zinga pasarih chu phase 1 leh pahse 2 trials neih mek niin candidate 2 chu phase 3 trial kalpui mek a ni.

Oxford University, United Kingdom-a an buaipui AZD1222 hi hmasawn chak ber pawl a ni a, phase 3 trial thleng tawh a ni. China leh Canada lamin an buaipui Ad5-nCoV te, United States lam siam mRNA-1273 te hian phase 2 trial an thleng tawh bawk.

Covid-19 vaccine: Eng hunah nge?

World Health Organization(WHO) chuan February, 2020 khan thla 18 tal a liam phawt loh chuan vaccine hi hman theiha a awm an rin loh thu an puang a. Vaccine hi market-a zawrh chhuah theih a nih theihna turin thla 12 atanga thla 18 vel tal chu ngai turin mithiamte chuan an ngai a ni. Hetih lai hian vaccine siamtu lian Serum Institute of India chuan Oxford-a an vaccine siam hi thla thum chhung velin India ramah nuai chuang siam hman an inbeisei thu an sawi a. Mahse tam tham tak an siam chhuah hma hian phase 3 trial an kalpui leh phawt a ngai dawn a ni.

Ram hrang hrangah hmasawnna tam tak a awm a, rin lawk dan leh beisei aia hmaa peih hman pawh a ni maithei a. Kuminah vaccine hi kan nei hman chiah lo a nih pawhin kum thar lamah chuan a awm hman beiseina sang tak a awm a ni.

Read More: Indian National Movement

Covid-19 vaccine: Price?

Covid-19 vaccine siam hi thil hautak tak a ni a, sum leh pai pawh tam tak sen tawh a ni a. Market-ah lo awm ta tehreng pawh ni se mi nawlpui hman theih tur leh hman phak tur hian a awm ang em tih zawhna a awm thei a. Sawi lawk chu har viau mah se Serum Institute of India hian dose khatah Rs 1,000/- bawr tura an siam theih tur thu an sawi a. Tin, siam tumtu hrang hrang an awm nual bawk avangin hei aia tlawm te pawh hian a awm thei bawk ang. Sorkar a zirin minpuiin an lei ngai loa leisak zawk te pawh thil awm thei tho a ni a, a vaccine hrim hrim a awm phawt chuan mi nawlpui tana ban phak a nih vat chu a beisei theih tho a ni.

Covid-19 vaccine dang

Covid-19 vaccine hman tlak tur awm kan tarlan bakah khian candidate dang tam tak a awm a. Tunah hian candidate 200 chuang a awm mek. Chung candidate zinga thleng thui deuh thenkhat tarlang ila:-

1. BNT162 (a1, b1, b2, c2): Germany leh United States siam hi phase 1-2 velah a awm mek.

2. CoronaVac: China ram siam niin phase 1-2 trial neih mek a ni.

3. INO-4800: United States leh South Korea lam siam niin phase 1-2 trial neih mek a ni.

4. AG0301-COVID19: Japan siam niin phase 1-2 trial neih mek a ni.

5. Chinese Academy of Medical Sciences, China-a an siam hi a hming vuah a ni lo a, phase 1-2 trial neih mek a ni bawk.

References

1. Vaccine - CDC, USA

2. Vaccine and Immunization - WHO

3. Clinical Trials Phases – NCCN

4. Landscape of Covid-19candidate vaccine - WHO

5. Covid-19 Vaccine trackers

6. When could a vaccine be ready– moneycontrol.com