Isua Ang Lo Turin

Chanchin tha kan dawn atangin kum za chuang a liam ta a, kan mimal nunphung, khawtlang hawi zawng leh hnam sukthlek chenin chanchin tha hrin a ni ta deuh vek a. Kan thil thlir dan leh thil hmuh dan hriltu ber pawh Kristianna a ni tawh a, kan ngaihtuahna leh suangtuahna zawng zawng pawh sakhuana huang chhung atanga duan a ni tlangpui bawk. Mahse eng emaw chenah hian fuh lo leh dik tawk lo a awm tlat si a, kan sakhuana chu min khalhtu ber a ni chung si hian kawng kan bo titih deuh tlat a ni si!

Kristianna hi Isua Krista atanga intan leh amaha innghat a ni a, a laimu pawh amah a ni. Kristianna chu Isua chhehvelah a vir a, Isua hnen bawk thleng leh tur a ni. Chuvang chuan khawvela Kristian zawng zawngte thupui chu Isuaah a ni tur a ni a, Isua hlata awm a rem lo. Kristiante chuan ‘Isua ang turin khawvelah hian…’ tiin zai kan rem tur a ni ang a, Isua hniak hnutchhiah kha zuiin khawvelah hian a Pathian ram chu kan zauh zel tur a ni.

Mahse vawiina kan Kristian dan leh kan awmphungah hian Isua hnung zui intite hian Isua an loh hram hram kan tum a ang ta viau mai a, Isua hniak sirah ke chhepin vung takin kan kal fua fua a ang zawk! Kan thupui pawh ‘Isua ang lo hram hram turin’ tih a ni ta ber mai e.

Isua chu hmangaihna a ni a, a pawimawh leh ropui ber pawh hmangaihna a ni. Pathianin khawvel a hmangaih em em avanga a fapa mal neih chhun khawvela a rawn tirh avanga chhandamna chang leh chu hmangaihna tawpkhawk avanga nun nei ta te erawh hi chuan hmangaihna kan tlachham ta hle. ‘Nangmah i inhmangaih ang bawkin i vengte hmangaih rawh’ tiin amah ngeiin uar takin min zirtir a, vengte hmangaih dan kan thiam theih nan a takin a lantir mawlh mawlh bawk. Mahse chu zirtirna chu min kaihruaitu atan kan pawm ta lem lo a, Isua zuitu inti chungin Isua kan zui ta lo a nih ber hi.

Read More: Indian National Movement

Hmangaihna ni loin huatna hmangin ram lak kan tum a, hmelma hmangaih chu sawi loh thenawm hmangaihna pawh kan nei ta lo hle mai. Kan tawngkam chhuak tinreng hi hmangaihna hmanga tihal a ni ta lo a, huatna hmanga tihkhak niin kan inkheiin kan inkheng fek fek hlawm a. Politics huangah phei chuan hmangaihna phum a nih na pawh ni li lai a liam ta. Kohhran leh kohhran inhmangaih tawnna ai chuan inhuat tawnnain hmun a chang lian tawh zawk a, chhungkuaah pawh hmangaih lohna hriin min luhchilh a, kan khumpuiah pawh hmangaihna hmel hmuh tur a awm ta lo hle a ni.

Isua chanchina pawimawh lai ber leh a ngaihnawm ber lai chu retheite lam a ṭang tlat ṭhin leh a hawisan ngai lo kha a ni a, an aiawha ding turin a tlanchhe ngai lo. Vawiina Isua hnungzuitu intite chungchanga a lungchhiat thlak ber leh ngaihthlak hre awm lai ber chu retheite kan hawisan a, kan tlanchhiatsan hram hram ṭhin hi a ni ang.

Khawvel mithmuhah a bultanna a ropui loh a, a hniam ve viau ang tho khan a nun chhoh dan pawh chho en vang vang ngai chi a ni lo. Thilmak a tihna hmasa ber pawh inneihnaa uaiin sem daih zo lo hnenah a ni a, thilmak a tih zawng zawng zinga tam ber chu miin an endawng leh an thinhrik phar tihdam a ni. Dinhmun hnuaihnung zawka dingte, khawtlangin a rah beh leh a hnehchhiahte lamah tangin an tan Pa nih a thlang ngat ngat thin.

Keini erawh chu kan ram rorelna zawng zawng te, kan khawtlang inrelbawl dan zawng zawngah te hian a dinhmun hnuaihnung zawk leh a chan chhe zawkte ngaihtuah an ni ve ngai lo a. A lera awm mi chak leh lian zawk, mi tlemte te tan kan ding a, daikil kara a berh ber ber chu aw an neih pawh kan phalsak lo.

Read More: Sachin Pilot - Lawng pil tur chhuahsan nge pil tura chhuak?

Kohhran chhungah lehzel pawh a nei deuh leh a khawsa thei deuh chuan lawm an hlawh huam huam a, rethei harsa zawk erawh chuan ngaihsaktu an van viau thung. Thawhlawm thawh tam thei deuh leh thawhlawm tlan huai deuh ho chu nui sang chungin an inchibai kual a, hlim leh nuam ti takin an inkawm khawm a. An bul lawkah, an kiangah chuan Isua’n leia a awm laia a kalsan ngai  loh leh a hawisan ngai lohte kha hrehawm leh kimki takin an lo tawm chaih chaih thung a! Kristianten kawng kan bo nasatna ber chu eng dang ni loin mi hnuaihnung zawkte kan zuan kan nasa lutuk lai hi a ni ngei ang. Kan zingah hian amah Isua kha lo kal leh ta se la, vawiina amah zuitu tha taka inngai tam tak hi chu a lam tang kan ni hauh lo ang.

Isua chu mi zawng zawng huap a ni a, a chanchin tha pawh mi chi tin huam zo a ni. Amahah khan mi zawng zawng an leng a, exclusive ni loin inclusive a ni. Mahse keini erawh chu kan inthliarin kan inthlei nasa em em a, kan hnenah hian leng lo an va tam tak em. ‘Aw hnam zawng zawng leh chin tin, tawng tin hi Van Lal nau ang a tahna kalvari-ah kan dang chuang lo e’ tih hla sa chunga lam luih luih thinte hian hnam leh chi avangin kan hmangaihna leh khawngaihna hi kan tisangin kan tizim a, kan nunah hian chi tin huam zo nun kan nei si lo. 

Hmanni lawka UP-a ashram pakhat atanga naupang chhanchhuah zingah khan Mizoram mi an tel a. Chanchin kan han hriat chian zel chuan Mizo naupang an lo tel lo hlauh a nih kha. Mahse khang naupang khawngaih thlak tak tak, retheih lutuk avanga a tha leh tha lo pawh ngaihtuah kim seng loa nu leh pain an tirh te kha Mizo an nih loh avang chauha kan khawngaihna dawng tlak loah kan ngai nge mawni kan sawi zui duh dan chu hmuh hrehawm tak a ni. Chutiang chuan kan hmangaih tur leh kan lainat tur te, kan tanpui tur leh kan chhanchhuah turte hi Isua ang lo takin kan thliar zut zut a, Isua hnungzuitu tih awm loh khawp hian kan che zui mai thin a nih hi.

Eng laiah hian nge dik lo a, khawi atang khan nge kawng kan bo tak erawh hriat mai theih ni lo mah se khua kan tlai hmaa harhchhuah erawh a tul viau a ni. Isua ang lo ngar ngar tura kan nun leh kan kalphung hi thlakin, Isua ang tur zawkin khawvelah hian kan nung ang a. Chu chuan kan ram, kan hnam, kan khawtlang leh kan kohhran thlengin a kaihruai tur a ni zawk. Chutah chuan kawng dik Isua kan pawh leh mahna…

Read More: Toonlaini Tuned-In