Hranghlui zaithiam C. Vansanga
hla pakhat lar thar leh em em a awm a,
chu chu ‘Kan Damchhan’ tih kha a ni.
Aw eng a’n nge maw Khuanu hian
Hringnun hi a lo duan le?
Thamral leh mai tur hian em ni le?
Duh vang rengin kan piang si lo.
tiin mihringa zawhna awm leh
mihringte rilru tibuai fotu zawhna lian tak kha hla hmangin a rawn puang chhuak
a.
Engvangin nge he khawvelah hian
ka lo pian chhuah ve ringawt a, engvangin nge he leiah hian ka lo awm ve? Ka
nun hian eng nge awmzia a neih a, kan nun hian eng hlutna nge a neih ve le? Dam
reng hian awmzia a nei meuh em ni? tih inzawtin nun awmze hriat lohna a hring
a, chu chuan mahni nunna pawh hlut zo tawh lo turin min hnuk lut a, thalai tam
tak an nunna titawpin mual an lo liam ta a ni. Vawiina la dam hram hram keini
zingah pawh hian existential crisis an tihin a bawh buai eng emaw zat kan awm
ngei ang.
Nun hi eng nge maw a awmzia le?
Nunna hi engvang nge maw a lo awm ve ringawt le? Thamral leh tur ringawt hian
em ni kan lo awm ve a, thih hun nghakin em ni kan lo nun reng zawk?
Genesis bung khat kan chhiar
chuan thilsiam chungchang kan hmu a, chang 26-ah chuan ‘Tin Pathianin, “kan
anpuiin, keimahni ang takin mihring siam ila, anni chu tuifinriata sangha
chungah te, chungleng sava chungah te, ran chungah te, lei chung zawng zawngah
te, rannung leia bawkvaka kal zawng zawng chungah te thu I neihtir ang u,” a ti
a.’ tiin Pathianin mihring a siam chhan dik tak tarlan a ni. Pathianin mihring
a siam chhan chu a aiawha thunei turin a ni a, a aiawha thilsiam dangte chunga
rorel turin a ni.
Aiawh tih chuan Pathian tan tihna
a ni a. Ram hrang hrangin an ram aiawha ram dang dawr turin ram dangah palai an
tir thin a. India pawhin India ram aiawh turin palai a tir thin. Chu’ng a palai
tirhte chu ama aiawh tur a nih miau avangin India tana tirh an ni a. He mite
chhungkua hi an fel em a, USA-ah hian zuk awm teh se, an fate zirna a tan pawh
a tha a lawm tih vang ni lovin; ram tan, ram palai hna thawk turin a tir a ni
zawk. Times square-ah an zuk heheu kual mai mai a rem lo va, Hollywood-a milar
an zuk selfie pui mai mai a rem lo. India ram aiawh an nih avangin India ta an
ni a, India tana theihtawp chhuah kha an tihtur a ni mai a ni.
Keini pawh nunna kan neih chhan
leh siam kan nih chhan chu Pathian aiawh turin a ni a, Pathianin ama ta tur
liau liaua a siam kan ni. Ephesi 2;10-ah chuan ‘Thil tha ti atan Krista Isuaah
chuan siama awmin Ama kutchhuak kan ni si a,’ tih kan hmu a. Ama kutchhuak tih
hi Grik tawng chuan Poiema niin Masterpiece tihna a ni. Thilsiam satliah mai
mai emaw, hraileng awmhlei dungthula tihpalh thil thu-a siam kan ni lo a, Ama
kutchhuak zawng zawng zinga kutchhuak tha ber kan ni zawk.
Chhan leh tum neia din kan ni a.
Ama tana min hman a tum dan chu a inang hauh lovang, mahse kan zavai hian a ta
ni tura uluk tak leh a tha thei ang bera
a siamte kan ni.
Chumi hre fuh chuan nun awmzia a
hria tihna a ni a, inthlahdah takin a nung thei tawh lo. Ruihhlo hmanga a nun
tihchhiat a rem tawh lova, khawvel khuang ben rema a lam a rem tawh hek lo.
A ta chauh ni tura a siam te chu
Setana thlemnaah tluin Setana tan kan lo inpe ta daih a! Eden huanah khan
Pathian rilru a na ngawt ang. A ta tura asiam te kha rukchhuahsak a ni a, a ta
te kha a ta anni thei ta lo va, awmna tur a buatsaihsak atanga hnawhchhuah hial
an ngai ta a ni. Pathian chuan mihringte neitu nih let leh tumin ruahmanna a
siam nghal a, mihringte chu a ta an nih let leh theih nan chhandamna a buatsaih
leh ta a ni.
Chhandamna hi hremhmun kan
pumpelh theihna tur atan ngawr ngawr emaw, Vanram kan kai theihna tur ngawr
ngawr emaw ni lovin Pathian ta kan nih letna tur atana Pathian inpekna a ni.
Van leh khawvel insumdawntawnna a ni a, nang leh kei hi min neitu panngai ta
kan nih leh theihna turin Beramno thisen hmanga lei let leh kan ni.
Chuti chuan ama ta ni tura a
chhanchhuah te chu ama tana nung tawh mai tur kan lo ni a. Hei hi ka nun a ni
a, ka duh ang angin ka chen thei tih a rem tawh lo. He nun hi siam a nih tirh
atangin Pathian ta a ni a, nunna kan hloh hnuah pawh Pathian tana nung leh
turin man tam taka lei kan nih avangin min neitu tana nun leh min neitu thu
thua awm mai hi kan damchhan chu a lo ni.
Read More : Mizo Sermon - A Hmela Damna Avangin
Comments
Post a Comment