About

Mizo Digest hi Mizote ta leh Mizote tan a ni. Mizo blog a nih angin Mizo \awnga ziah a ni.

Mizo Khawtlang nunah hian sawi zawh sen loh leh ziah chhuah kim rual loh thil tam tak a awm a. Kan nunphung te, kan ngaihven zawng leh kan ngaihpawimawh zawngte bakah kan chanchin leh kan hriat duh zawng thleng hian chi hrang leh darhsarh tak tak a ni. Chu’ng chu ziaka dah chhuah a, awlsam taka hmuh leh en theih tura chhawp chhuah a \ul em em a, chu thil \ul tak tihhlawhtlin tum chuan Mizo Digest blog hi buatsaih a ni.

Tualchhung pawn lam, kan khawvel piah lama thil thleng leh thil awm dan, thil nihphung tam tak hian min nghawng nasa em em bawk a. Chutianga kan khawtlang nun nghawng pha ve thil leh nakin hun thlenga min la nghawng zel tur thil hrang hrang te, kan lo hmelhriatna tur leh kan lo dawnsawn theih nana Mizo \awng ngei hmanga dah hi a pawimawh em em bawk a ni.

Kan chanchin liam tawh te, kan hriat zui tak loh thil tam takte tihnun leh tumna, mipui vantlang ngaih dan leh ngaihtuahna piah lamah mi nawlpui thlir loh dan zawnga thlirna tarmit pawh kan mamawh bawk. Chumi tur atana hmunhma lo buatsaih leh dawhsan lo siam hi Mizo Digest tum ber pakhat a ni.

Internet khawvelah kan cheng tawh a, tu pawh mai hian smart phone nalh tak tak leh thiltithei tak tak kan lek fer fur tawh a. Kan hun ei raltu tam ber leh kan ngaihtuahna kaihruaitu tha chak ber a lo ni ta. Chumi avang chuan lehkhabu chhiar keuh keuh emaw, chanichinbu pharh duai duai lam emaw chu mi nawlpui thinlungah a awm ta lem lo a, a \ul tihna pawh a awm tawh hek lo.

Chutianga print media a thih riai riai lai si chuan Mizo te tan, Mizo \awng ngeia chhiar tur thuziak hmuh tur a tlem telh telh a, thuziah hmanga thlen phak loh leh thlen rual loh tam tak kan lo awm ta a ni.

Lukham sira lehkhabu kan dah ur \hin kha phone tetakte tak hian a luahlan zo tawh a. Kan tapchhak zawl leh kan khumpui thlengin a luh chhuah tawh a nih hi.

Chu khawvelah chuan internet hmanga chhiar theih Mizo \awng thuziak a tlem viau lawi si a. Internet khawvela kan thil hmuh leh hriat lah chu thu puarpawleng leh belhchian dawl lo a lo ni fo bawk si! Chu harsatna chu \henkhat chuan harsatna a ni tih pawh kan chhut kher lo ang a, vei a \ulna chhan pawh kan hmu kher lo ang.

Kan chhehvel boruak leh thil thlengah hian sawi tur nei tam tak kan awm ang a, sawi ngaihna hre si lo pawh kan tam viau bawk ang. Mizo Digest hi chutiang mite tana buatsaih chu a ni a, thlen phak lohte hnen thleng pha tur leh aw nei lo leh an aw neih chhun pawh hliaha awmte aiawha aw chhuahsak hi kan thil tum bul ber chu a ni.

Mizo Digest blog hi chanchinthar ziahna tur a ni lem lo a, literature fir ngun mai chauh thlurna tur a ni hek lo. A rualkhai thei ang berin, mi zawng zawng huap thei tur thuziak ngaihnawm, rintlak, bengvarthlak leh ngaihzawnawm tak chhuah \hin tum a ni.

Mizo Digest hi lo tlawh a, min thehdarhpui turin kan ngen a che.