Mizo Kutchhuak Poetry Bu

Mahni puala hawrawp kan neih aṭanga vawiin thleng hian lehkhabu buatsaih leh tihchhuah lamah hma kan sawn ve zel a. Induhkhawp loh chang tam viau ṭhin mah se mahni tawkah chuan literature huangah hian thleng thui ve tawh tak kan ni. Kum tin lehkhabu chi hrang hrang pawh za chuang chuang a chhuak ve zut zut a, hmasawnna tih loh rual a ni lo.

Literature ṭhuang hrang hrang pawh kan dai dar chho ve zel a, ṭhenkhatah phei chuan hausa ve tawh tak te pawh kan ni kan ti thei ang. Amaherawh chu kan lehkhabu chhuah dan hrang hrang thlir erawh chuan literature ze hrang hrang zinga upa ber pawl poetry lamah erawh chuan kan la pachhe angreng viau a, poetry hlang lehkhabu pawh kan la ngah lo hle. Kum 1989 aṭanga Mizo Academy of Letters-in kum tin an thlan ṭhin Book of the Yearah pawh kan mi thiam F. Lalzuithanga sawi danin top 10 thleng thei kum 2019 thleng khan 10 chauh a la awm.

Chutih rual erawh chuan poetry bu hi a chhuak ve leh zauh zauh ṭhin a. Tunhnai chhoah phei chuan pun pawh a pung chak ve viau a ni. Tunah hian Mizo kutchhuak poetry bu hrang hrang kan thlir kual thuak thuak dawn a. A ṭha ṭha thlan chhuah emaw a ni hran lem lo a, ban phaka awm hnaivai, ka lehkhabu bawma mi ho an ni a, tarlan loh poetry bu ṭha tak tak dang pawh a awm nual bawk a ni.

Read More: Zuahliana Thawnthu

1. Tinkim Dawn by Malsawmi Jacob

Thu leh hla lama sulhnu nei ṭha tak Pi Malsawmi Jacob poetry bu hi kum 2003-a chhuah a ni a. Phek 107-a chhah niin Mizo ṭawnga ziah poems 22 leh English poems 50  dah khawm niin cheng 40 man a ni. 

Duhsakna thuhma ziaktu Dr Laltluangliana Khiangte chuan 'Zonu awm nem tein finna thu hlu tak pai, a thlawra thlawr fim thu leh hla dak ṭha tak a rawn sin chhuak ta mai hi a va'n tihzia tehlul em!' a ti thlawt a ni. Mizo hla phuah dan tlanglawn pangngai ang ringawt ni loin kawng thar sah kuak a tum a, form hrang hrang enchhin kualin poetry ṭha tak tak min chhawpsak a. Kum tam liam hnu pawha hlu zual deuh deuh tur lehkhabu a ni.

Khawvel puma poetry form lar ber pawl sonnet pawh form thar duangin Zo Sonnet a rawn tichhuak a, rhyme scheme han chelek vel pawh zei tak a ni! Tinkim Dawn lehkhabu hlut zualna em em erawh chu a poetry te hian nula leh tlangval inngaihzawnna luangliam satliah lam hrut satliah loin ram leh hnam hnuk khawih thei thil thupuia a nei hi a ni bawk.

2.  Ngaihrilvawn by Lalnunpuia Hrahsel

Kum 2006-a tihchhuah Lalnunpuia Hrahsel lehkhabu hi phek 162 laia chhah niin hla chi hrang hrang 129 zet a awm a, cheng 60 man a ni. Hlahril leh hla chhunkhawm tih a nih ang takin hla ṭhenkhat phei chu a saka sak theih tura thluk nei leh solfa te nen thlapa dah a ni bawk.

A zavai chuan ni lo mah se poetry eng emaw zat hi a phuah chhan leh phuah hun lai boruak te tarlan zel a ni a, a hla tum leh thupui te awlsam takin a lo hriat zung zung theih a. Ṭhenkhat erawh chuan hetianga phuah chhan emaw tarlan zel hi an duh kher lo maithei bawk.

Ngaihrilvawn hi ṭhen thumah ṭhen niin a hmasa ber Hlahril tihah hian 89 a awm a, Fakna Hla 29 awm lehin Tualleng Hla 12 a awm leh bawk.

3. Rochuam by Laltluangliana Khiangte

Mizo thu leh hla huanga arsi eng ber pawl pakhat Laltluangliana Khiangte lehkhabu hi poetry hlang dahna chiah chu a ni lo a. Mahse poetry 66 awmin hla leh a kaihhnawih thuziak hrang hrang a awm tel a, lehkhabu hlu tak a ni. Kum 2006-a chhuah lehkhabu hi cheng 70 man a ni.

Poetry hi hla tia kan sawi mai songs nen lak hran leh hming hran pek ngaia hriain Chhamhla tih a rawn hmang thar a, a hnu zelah pawh hman zui a hlawh viau bawk. Rochuam hi ṭhen li lai a awm a, chhamhla chi hrang hrang 66 te chu ṭhen hnihnaah dah a ni. Chhamhla chi hrang hrangte hi phuah kum dah thlap a ni a, a kaihhnawih thlalak a awm deuh vek bawk.

He lehkhabua chhamhlate bakah hian chhamhla leh hla chungchang thuziak hrang hrang hian a tihlu zual em em a, tin, a ziaktuin chhamhla chungchanga a tawnghriat hrang hrang ngaihnawm tak a awm tel bawk.

Read More: Kawlkil Piah Lamtluangah Zawlaidi - Natalia

4. Chhamhla & Thinlung Tuifar by C. Lalhruaitluanga

Lunglei lam mi C. Lalhruaitluanga hi poetry phuah kawngah chuan kuthmui ber pawl a ni ngei ang. Tuna kan sawi lehkhabu pahnih hi poems hrang hrang dah khawmna ve ve a ni a, lehkhabu chhah tak erawh a ni lo ve ve thung.

Poems 58 awmna Chhamhla hi phek 61 leka chhah a ni a, cheng 50 man a ni. Poems tinah hian eng form hmanga phuah nge tih te, a rhyme scheme hman te pawh tarlan thlap a ni.

Lehkhabu pakhat zawk Thinlung Tuifar hi a hmaa kan sawi aiin a chhah hret a, poems 61 a awm. Kum 2013-a chhuah a ni a, he lehkhabuah pawh hian eng form nge tih te, eng rhyme scheme nge tih te tarlan a ni a, hla thu hman hrilhfiahna te pawh dah tel a ni bawk!

5. Unsung–Maudlin Monodies by John Laltluangliana 

Tlangzarh loh lehkhabu hi ṭhangthar, sap ṭawnga thu leh hla ziak ṭhin, social media hmanga a kutchhuak phawrh zauh zauh ṭhin, ṭhalai tam tak lawm leh ngaihzawn kutchhuak a ni a. English poems ngaihtuah tithui leh hipna ngah tak tak 46 bakah prologue leh epilogue hran a awm bawk.

Notion Press kutchhuak a ni a, a chhung thu sawi tel loh pawha lehkhabu ngaihzawnawm tak ni sa hrim hrim a ni. Chhinchhiah tlak deuh chu John Laltluangliana hi literature zirlai emaw ni loin Agriculture lam officer daih a ni! Social media platform chi khat Instagram lama GinjiroMizo intia thuziak ṭhin kha a ni a, tam tak chuan kan hre viau ngei ang.

A hnuaia poems pakhat hi en chhin la, phek 72 leka chhah siah hian thawnthu tam tak a inphum tih i hre thei ngei ang.

Read More: Mobile Apps Tangkai - Hman Ngei Ngei Chi

6. Mim Fang Khat by TS Khupchong

Mizo lehkhabu chhuak tawh zawng zawng zinga lehkhabu man to ber ni hial tur TS Khupchong poems dah khawmna lehkhabu hi cheng 65,000 man a ni! Phek 104-a chhah niin poems 61 a awm. He lehkhabu hi lehkhabu dawr vela zawrh chhuah chur chur tura siam ni loin limited edition a ni a, TS Khupchong lehkhabu pasarihna a ni.

TS Khupchong hi ṭhangthar zinga Mizo thu leh hla tana thawh hlawk berte zinga mi a ni a, Mim Fang Khat bu-a poems hote pawh a mal mala hlutna nei ṭhiau a ni.

Mim fang khat kha an phel a
Fang hnihah an chantir ta a

Puar leh fan nan hmang lo mah se
Reh lo tur thawnthu a awmtir thung.

Ni e, poetry hian puar leh fanna thlen lul lo mah se, reh lo tur thawnthu tam tak kengtu leh siamtu a ni!

8. Purloined Emotions by Debbie Rinawmi

English Literature zirlai, master thleng rawka zir zo kutchhuak hi English poems 76 awmna a ni a, phek 93-a chhah a ni.

Radiant Publication kutchhuak a ni a, Mizo nula pakhat suangtuahna leh thinlung luangliam, emotions hrang hrang chawhpawlh awm khawmna a ni. Hringnun hlimthla fiah taka tarlanna a ni a, lungngaihna aṭanga hlimna, natna leh damna insaikalh nukna lehkhabu a ni.

A chang chuan heng poems te hian a ṭahtir ang che nga, a chang chuan i hlim ang a, nuih kiai sakna tur te pawh i chhar ang. A zavai hian mi hip bet vang vang thei ni ṭheuh mah se erotics poems ho hian a hipna ber ve tho maithei che!

Read More: Mizoram VC/LC Inthlan 2020

9. Zaikung Thar I, II, III by Mizo Poetry Society

Kum sang bi 21-na hnu lama Mizo poetry ṭhan nasat dan hmutu leh chumia tha thawh hlawk ber pawl, Mizo poetry tuipuitute inzawm khawmna pawl, Mizo Poetry Society chuan ṭhangthar hmasawnna hi nakin zel atan pawh a zira zir tham la ni dawnin a hria a, kum 2017 khan Zaikung Thar–21st Mizo Poetry Series tiin hla phuahtu chhuaktharte kutchhuak chu lehkhabuah a siam ṭan a. Tun thleng hian bu thum siam a ni tawh.

Mipoty(Mizo Poetry Society) founding president Prof. RL Thanmawia chuan 'Tun hmaa Mizote lunglenna ber "chul hlui" leh "nun hlui" ngawt ni tawh lovin, hla thu awm sa hmanga kan duh zawng leh vei zawng "hla thu no leh kungkuai, lung tileng" hlep hlep thei hmanga hringnun lungnona leh lunglenna kaihthawh tuma hla phuah ngawt lovin, ṭawng tualleng leh hla thu chher chawp hmangtein poetry an phuah ta mawlh mawlh mai a; an siam zung zung a, an din thar ta sup sup mai a ni.' a ti a. Chu chuan Mizo poetry ṭhan chhoh tak dan leh Zaikung Thar bu hoa ṭhangthar kutchhuakte hi a hrilhfiah chiang hle.

Bu khatnaah hian Mizo ṭawnga mi hrang hrang 38 ziah poems a awm a, mi 12in sap ṭawnga an ziah a awm bawk. Kum 2018-a chhuah bu hnihnaah hian Mizo poems mi 38 ziah tho a awm a, 12 kutchhuak English poems a awm leh bawk. A bu thar ber kum 2019 maia tihchhuahah hi chuan mi 52 kutchhuak Mizo poems a awm a, English poems, mi 9-in an ziak leh bawk a ni.

Zaikung Thar hi bu dang pawh la awm zel tura ngaih a ni a, ṭhangthar poems ziak ṭhin zawng zawng deuhthaw kut hnu a awm a, Mizo poetry zirchianna leh zirbingna lamah pawh lehkhabu ṭangkai tak tur a ni ngei ang.

10. Aikaih & Rip by Anita Vl Nunmawii

Anita Vl Nunmawii lehkhanu pahnih Aikaih leh Rip bua poems awmte hi hranghlui ṭhenkhat chuan hla pawh a nih niau loh hi an ti maithei. Mahse kan hla phuah dan leh kalphung pangngai pet pet ringawt kha chu kan kham khawp ta meuh lo a, ṭhalai lawm zawng leh chhiar peih chi pawh a ni hek lo.

Anitai poems erawh hi chu ṭhalai zawkte rilrem tur taka duan a ni a, a ziaktu hian dan leh phuartu pawh nei loin a thinlunga awm a duh dan takin a puang pawp pawp mai a ni.

Aikaih hi phek 100-a chhah niin poems tawite te 89 a awm. Rip hi Rest in Peace tihna ni loin Mizo ṭawnga Rip kha a ni. Kum 2019-a chhuah niin phek 119 a awm a, cheng 130 man chauh a ni.

Hemi Link atang hian a order theih e.

11. secondhand scars by rdp

Khawvel pum pawha ṭhang duang em em chu poems tawite te, poems ai maha quote pawl lek lek ang, mobile phone hmanga en mai theih, social media vela share awlsam tak Instagram poems an tih ang hi a ni a. Social media chi khat Instagram aṭanga lar chhuak a ni ber. Lang Leav te, Rupi Kaur te ho hi chung ziak ṭhin zingah chuan a langsar an ni a, milem eng emaw nena hmehbelin, picture caption ang lek lek, tlar hnih emaw tlar thum emaw vel lek tein an ziak ṭhin. Literature huangah hian chanvo an nei tak tak em tihte pawh inhnialna tam tak awm mah se hnual theih hauh loh erawh chu chhiartu duh zawng tak a ni tih hi a ni. 

Chutiang chu Mizo zingah pawh ziak ṭhin an awm ve nual a. rdp hi a langsar ber pawl a ni ang. English-in a ziak ber a, hnamdang zingah pawh duhtu leh share taima tak tak a ngah a ni. secondhand scars hi chung a kutchhuak dah khawmna chu a ni a, phek za hnih laia chhah a ni.

Thuhmahruai leh sawi hawnna neuh neuh pawh awm loin a inrem tawp mai a, a tam ber hi chu thupui pawh nei lem chuang lo te an ni. 

He lehkhabu hi ṭhalai leh tleirawl lam lawm zawng tak a nih vang a ni maithei lehkhabu hralh kal ber pawl a ni.

Read More: All the lights we cannot see

12. Songs of Camellia by lalremruata sailo

Kumin mai kum 2020-a tihchhuah English poems bu hi Mizoram University lama English literature zirlai kutchhuak a ni a. Phek 117-a chhah niin cheng 150 man a ni.

Hlawm thum Sabdariffa, Roselle leh Sinensis tihah te ṭhen a ni a. A hmasa ber Sabdariffa-ah hian poems 39 a awm a, hnam dang zingah pawh chhuang taka phawrh chhuah tlak ṭhiau a ni hlawm. Hlawm hnihna Rosselle leh Sinensis erawh hi chu thupui hran pawh nei tawh lem chuang lo, poems tawi hrang hrang an ni thung.

Covid-19 hripui leng avangin lehkhabu chhuak te a han deuh duak ang a, Mizo literature tana kum chhiat kum a ni dawn a nih hi tihlaia hetiang lehkhabu, kan ram pawn thleng thleng pawha zahpuiawm lo a han chhuak hi a lawmawm hle a, lei pawh inchhirawm loh tak tur a ni.

He lehkhabu hi hemi Link aṭang hian a order theih e.

13. Rawlthar Awrawl by Ramlawt Dinpuia

Kum 2018-a chhuah a ni a, bu 4, Khawthlir, Hmangaihna Hmel, Sunna leh Thim leh Eng tihah ṭhen a ni.

Hemi Link aṭang hian order theih a ni.

Read More: Isua Ang Lo Turin

Sawi tawh ang khan tuna kan tarlan bakah hian Mizo kutchhuak poetry bu eng emaw zat a la awm a, sawi kim sen pawh a ni lo hial ang. Mizo kutchhuak poetry bu hoah hiang eng nge chhiar tlak ber ang le?

He article hi i hlawkpui emaw i ṭangkaipui emaw a nih chuan khawngaih takin blog hi min subscribe sak ve la, article ṭangkai leh ngaihnawm tak tak i lo hmu ve zel dawn a nia.