Skip to main content

All The Lights We Cannot See

Image
By Ramlawt Dinpuia,

Indopui pahnihna behchhana American ziaktu Anthony Doerr novel, kum 2015-a Pulitzer Prize for Fiction dawngtu, ‘All The Light We Cannot See’ tih kha lehkhabu hming mawi ber pawl a ni maithei. Paris-a mitdel hmeichhe naupang Marie-Laure LeBlanc leh Germany rama lungalhthei laihchhuahna khaw pakhat Zollverein-a mipa naupang Werner Pfennig te chanchin leh khawvel indopuiin an nun a nghawng chhoh dan te a ni a, kum 2014-ah chhuah niin The New York Times Best Seller list-ah a zawnin kar 130 lai a lang nghe nghe a ni.

A chhung thu ai mah chuan a bu hming hian mi a hneh a, ngaihtuah a tithui viau.

World Health Organization report danin khawvel mipui hmun li-a thena hmun khat hian thil hmuh lam harsatna an nei a, chu chu 2.2 million vel zet a ni. Vanduaina leh chhan hrang hrang avanga mitdel leh khaw hmu fiah lo heti zat an awm lai hian khaw hmu fiah tha pangngaia inngai zawng zawngte pawh hi eng emaw kawng zawng tak chuan thil hmuhfiah theih lohna te, hmuh that duh lohna leh hmuh thiam lohna te hian min tibuai ve tho a. Tawngkam danga sawi chuan mitdel vek kan ni te pawh a tih theih ang.

Read More: Hagia Sophia A Chim

Harsatnain min han bawh tak tak a, vanduainain thla min han zar phui hnan hmuk chuan a eng lam thlir hram hram tura infuihnate hi a bengchheng thlawn mai tawh thin a. Kan nunah chinfel theih si loh buainain tiau chhum anga min zin hnan tawh chuan hmuh tur a lo vang thin khawp mai, buaina mai lo chu. Engtikah emaw chuan engkim a la tha leh vek mai ang tiin han inhnem thin bawk mah ila engtik emaw tak chu hmuh a har thin si a, beidawnna ruam atanga beiseina eng hmuh talh tum te hi thil harsa tak a lo ni.

Intlansiakna khawvelah inel reng renga hun kan hman mek lai hian hnehtu kan nih theihna turin kan bei a, a chak leh dingchang nih tumin tha tawp kan chhuah a. Mahse chumi kawnga kan tlan lai chuan mihring tling nih kan tumna lamah hian mihrinna kan hloh telh telh thung. Mahni leh mahni chauh kan inhmu lian tawh a, kan dinchanna tur leh kan ropuina tur bak kan thlir thiam tawh hlawm lo.

Mahse mahni chauh hian a dam khaw chhuah theih si loh a, mahni chauha hnehna chan chu thil theih a ni si lo. Tawpna thlen tuma kan tlan suau suau lai hian kan kianga tlan ve te chu an tlu a, ngaihsaktu leh ngaihventu mamawh ngawih ngawihin min thlir a, keini lah chuan kan hmalama lawmman chauh kan thlir avangin min kotu aw kan hre lo a, chaute chhawm turin kan hmu thei hek lo!

Read More: Isua Ang Lo Turin

Kan ngaihdan chu ngaihdan dik berah kan ngai a, kan thlir dan chu thlir dan dik ber leh kan thlirna tarmit pawh tarmit fiah berah kan ngai a. Kan thlirna tlang lam atanga lang thei chin chauh chu thil nih dan turah ngaiin kan hmuh phak loh lam zauzia kan chhut pha lo a, kan hmuh duh chin bak hmuh kan tum zui hek lo. Tlemte chauh hmu pha si hian kan hmuh loh leh hmuh duh loh lam ngaihtuah chang hauh loin buklung kan lo khai a, thutlukna siam zung zungin dik leh dik lo kan lo thliar thuai thuai a, kan rin thu leh kan thu rin chu dik lo thei loah riak kan ngai bawk si!

Hetiang reng reng hi kan nunphung a lo nih takah chuan hmu fiah inti em em chungin khaw hmu tha thei loah kan chang titih ta a, eng zung tam tak, kan hmuh kan hi a lo thlur seng sung thin.

Eng tam tak, kan hmuh loh leh hmuh duh loh kha thenkhat tan chuan thil lan chiantirtu a ni a, thenkhat tan chuan awmze bul a lo ni bawk a. Chung eng kan hmuh kan tam tak avang chuan keimahni-a eng awmchhun kha a dim telh telh a, hlimthla siamtu atan chauh lo chuan a hman zui tlak loh fo thin.

Kan thil hmuh phak lohte hi kan hmuh phakte siamtu a nih tlat si avangin kan hmuh lohte hi awmze nei lo leh tangkaina nei lo a ni chuang lo a ni tih hriat hi khaw hmu fiah tura a bultanna chu a ni ngei ang.

Read More: Indian National Movement

Labels:

Comments

Post a Comment

Popular posts from this blog

Mizo Sermon : Kan Dam Chhan

By Ramlawt Dinpuia,
Hranghlui zaithiam C. Vansanga hla pakhat lar thar leh em em  a awm a, chu chu ‘Kan Damchhan’ tih kha a ni. Aw eng a’n nge maw Khuanu hian Hringnun hi a lo duan le? Thamral leh mai tur hian em ni le? Duh vang rengin kan piang si lo. tiin mihringa zawhna awm leh mihringte rilru tibuai fotu zawhna lian tak kha hla hmangin a rawn puang chhuak a. Engvangin nge he khawvelah hian ka lo pian chhuah ve ringawt a, engvangin nge he leiah hian ka lo awm ve? Ka nun hian eng nge awmzia a neih a, kan nun hian eng hlutna nge a neih ve le? Dam reng hian awmzia a nei meuh em ni? tih inzawtin nun awmze hriat lohna a hring a, chu chuan mahni nunna pawh hlut zo tawh lo turin min hnuk lut a, thalai tam tak an nunna titawpin mual an lo liam ta a ni. Vawiina la dam hram hram keini zingah pawh hian existential crisis an tihin a bawh buai eng emaw zat kan awm ngei ang. Nun hi eng nge maw a awmzia le? Nunna hi engvang nge maw a lo awm ve ringawt le? Thamral leh tur ringawt hian em ni kan lo awm ...
Post a Comment
Read more

Mizo Kutchhuak Poetry Bu

By Ramlawt Dinpuia,
Mahni puala hawrawp kan neih aṭanga vawiin thleng hian lehkhabu buatsaih leh tihchhuah lamah hma kan sawn ve zel a. Induhkhawp loh chang tam viau ṭhin mah se mahni tawkah chuan literature huangah hian thleng thui ve tawh tak kan ni. Kum tin lehkhabu chi hrang hrang pawh za chuang chuang a chhuak ve zut zut a, hmasawnna tih loh rual a ni lo. Literature ṭhuang hrang hrang pawh kan dai dar chho ve zel a, ṭhenkhatah phei chuan hausa ve tawh tak te pawh kan ni kan ti thei ang. Amaherawh chu kan lehkhabu chhuah dan hrang hrang thlir erawh chuan literature ze hrang hrang zinga upa ber pawl poetry lamah erawh chuan kan la pachhe angreng viau a, poetry hlang lehkhabu pawh kan la ngah lo hle. Kum 1989 aṭanga Mizo Academy of Letters-in kum tin an thlan ṭhin Book of the Yearah pawh kan mi thiam F. Lalzuithanga sawi danin top 10 thleng thei kum 2019 thleng khan 10 chauh a la awm. Chutih rual erawh chuan poetry bu hi a chhuak ve leh zauh zauh ṭhin a. Tunhnai chhoah phei chuan pun pawh a pung chak v...
7 comments
Read more

Mizo Sermon : A Hun Loa Rawngbawl

By Ramlawt Dinpuia,
Khawvelah kum 30 vel a cham chhunga chawimawi a hlawh ve awm chhun ropui taka Jerusalem an luh hnu khan Isua leh a zirtirte kha Bethani-ah an let leh a, zan an riak nghe nghe. A tukah, chu khua aṭanga an chhuah leh hnu chuan zing thingpui an in hman lo te pawh a ni maithei, Isua kha a rilṭam ta tlat a. Chutia rilṭam taka a awm lai chuan ral hla deuh takah theipui kung hnah hring dup mai hi a hmu a. "A rah ka hmu dah law maw," tiin a va pan a, mahse a rah reng reng a lo awm lo. Theipui rah hun a ni lo miau a! Khawvel thlirna aṭang chuan, "theipui rah hun pawh a ni lo a, a rah a lo awm lo hi a awm reng a nih hi" tih mai tur a ni a. Mahse Isua chuan theipui, a rah hun ni miah loa rah lo chu, a rah loh avangin a hau hlum hmak! Isua pawh hi a timak ve reng reng, a rah hun lai taka rah lo palh chu hau hlum pawh ni se a awm reng a, leilung kal danah hian a dem awm hauh lo ang. Mahse, a rah hun laia lo rah lo pawh ni lo, a rah hun ni miah loa rah lo kha a pawm awzawng lo! P...
Post a Comment
Read more