Lehkhabu eng emaw zat a tichhuak tawh a. Mahse copy tam tak chhut a nih ngai loh avangte hian hmuh tur a awm tawh mang lo deuh vek a. Heng, Lungmawl Selin, Saruak Hlimthla, Thukna Pawnlang, Putar leh Khuai, Kawhterenga tih te hi a neitu tan chuan intihtheihpui tham fe an ni zel a. Lehkhabu dang chu ṭhiante hawh chhuahtir ui ngai miah lo pawhin Lalzuahlian lehkhabu ho chu an roh viau zel.
A hretu tam ber chuan poet ṭha leh danglam tak a nihnaah kan hre fur ang a, essayist leh short story writer a nihna lam chu kan hre vak lo maithei. A kutchhuak dangte pawh hi a poetry ang thoa chhiar har leh rilru sen ngai a ni ṭhin a, vawikhat chhiara hriatthiam nghal mai theih chu a tam lo.
Read More: Zan Lalnu
A kutchhuak zingah hian eng nge ṭha ber tih thlang dawn ila ngaihdan a inang lo nuai dawn a. Mi pakhat lek pawhin a ber chu a thlang chhuak thei kher lo ang. Keimah mimal min tibuaitu leh ka ngaihtuahna luah rengtu chu Puanin Chhete tih thawnthu tawi kha a ni a. Saruak Hlimthla tih lehkhabua awm kha a ni. 
Friends Publishing House chhuah, Saruak Hlimthla hi lehkhabu pan te, phek 95 chauha chhah a ni a. A pan avang ngawta enliam mai theih erawh a ni lo. Thawnthu tawi leh hla dahkhawm niin hlawm hnihah ṭhen a ni a, thu 11 awmin hla 5 a awm bawk.
Puanin Chhete tih hian phek li leh a chanve chauh a awh a, paragraph kua chauh a ni bawk.
A thawnthuah chuan in ropui leh nalh tak tak O shape anga ding kual ruih mai hi a awm a. Chung inte chu mi pakhat kutchhuak tih hriatna riau awm mah se inang vek erawh a ni si lo. Mi vengva leh fing tak tak pawhin chung in chu an hre chiang kim tak tak thei lo a, hruaitu ṭha tak neih loh phei chuan an bo fo a ni. Chung in satu chu mi danglam tak mai a ni a, a in sak dan blue print ang pawh hmuh tur a hnutchhiah loh avangin a zirchiangtute tan pawh a buaithlak viau a. Tin, hmanrua a hman ho pawh a awmsa lakkhawm ni loin ama siam chhuah thar vek ni zawkin a lang hial a ni. Chutiang in mak leh ropui a nih avang chuan khawvela thilmak sawi nikhua pawhin an lam hmaih ngai lo hial.
Read More: All The Lights We Cannot See
Mahse chung a mawina leh ropuina zawng zawng aia mak zawk thil a la awm cheu a, chu chuan a makna dang zawng zawng pawh kha a timak lo vek thei hial a ni. In ropui leh mawi tak takin an din hual chhungah chuan puanin chhete mai pakhat hi a awm a. Puaninah pawh puanin mawlmang ber chi a ni lehnghal! Chu puanin chu in ropui tak tak an sak ruala siam ve niin an ring a, a puante pawh a thler hrup tawh a, a bante pawh a sawi lei lui a. Ngaihsak leh duat a hlawh lo viau a, in ropui tak taka chengte chuan hnawmhnawk chitin paih khawm nan puanin chhehvel chu an hmang bawk.
Chu puanin ṭawp tawh tak mai chu ina chengte chuan hnawk an ti a, ṭhiah mai te pawh an duh rum rum. Mahse in sak dan zirchiangtuten chung in ropui zawng zawng innghahna chu chulai puanin chheteah chuan a inthlungkhawm vekin an sawi a, in ropui tak tak nghehna chu puanin sawi bim bem chuan a hril tlat an ti bawk si a, hnawk ti eng ang mah se an ṭhiat thei lo. Chuti khawpa an chenna in lian leh ropui tana pawimawh ni si chu a chengte chuan an ngaihsak chuang hauh lo a, dimdawi taka enkawl phei chu hla tak a ni. Puanin kaihna ban leh bang vel te chu kut thak hnawih nan an hmang vel mai mai a ni.
Chu puanin mak danglam tak mai chu belchiang turin kan thawnthu sawitu hi a va kal hnai a, hnawmhnawk chitin karah chuan a va pan a. Puanin chhe tak chuan ngaihsaktu a nei lo hulhual bik lo a, a ṭet lai thawm ṭhatute pawh an awm ve ṭhin tho a ni tih a va hriat phah a. Mahse chung hna ṭha chu tih tham a ni chuang hauh lo a, puanin pawh chu bawlhhlawhin a hnawh muk reng tho. A rimchhiat em avanga hnar hup chungin puanin chu a va keu da da a, a chhung a han hawi kual chuan mak a tih lehzualna turin, puanin chhungah chuan hmeichhe pakhat, pawisawi lo hmel zet hi a lo ṭhu khar a!
Chu chu a thawnthu tlangpui chu a ni a, chhiar puat phei chuan ho tak a ni. Mahse han ngaihtuah chet chet erawh chuan he thawnthu hian eng emaw sawi a tum a, eng thil pawimawh tak emaw tarlan a tum niin a hriat. Eng nge a sawi tum tak tih erawh hriat a harsa leh bawk si.
Read More: Hagia Sophia A Chim
Lalzuahliana hian tunlaia kan hriat lar tak Feminism lam hi a rawn aupui a ni thei mai ang em aw tih ngaihdan a awm thei a. Mihring chanchina ropuina te, hmasawnna leh changkanna zawng zawngte pawh hi hmeichhiateah a innghahna chen tam tak a awm a. Hmeichhiaten an ngaihsan leh an ngaihven chu ram pumin kan ngaihven leh kan ngaihsan a ni nghal zel te pawh an tih ṭhin hi. Tin, hmeichhiate dinhmun a ṭhat a, hma an sawn chuan ram pawhin hma a sawn a, ram pawh a nghet telh telh ṭhin a tih theih bawk.
Chutih rual chuan a tam zawk mah hi chuan hmeichhiate dinhmun chawikansak lamte hi kan ngaihthah em em a, hmeichhiate ngei pawh hi tam tak rilruah phei chuan kut thak hnawihna atan te, inthemthiamsiakna atan te kan duh deuh tlat bawk a. Chutiang zawng zawng ngaihtuah chung chuan Zuahliana hian feminist thurin a lo aupui reng a ni thei a. Amah hrim hrim hi a hun loa piang tih ang maiin mi tam tak ngaihtuah phak loh ngaihtuah thleng pha a nih avangin hemi hi a nih theihna kawng a awm. 
Ngaihdan dang awm lehah chuan Zuahliana hian environment issue a rawn khawih a nih hi a tih theih a. In satu kha Siamtu Pathian aiawhah lo ngai ta ila, mihring ropuina leh hmasawnna zawng zawng hi nature-ah a thung khawm vek a. Mihring leh kan chhehvel inkungkaih dan zirtute chuan mihringte hi keimahni chauha nung thei lo leh kan chhehvel(environmen)-a innghat tlat kan ni an ti a. Thawnthua in ropui leh mawi tak takte puanin chhetea an inthlung vek ang khan mihringte pawh hi khuarel thil hian min chelh ṭang ṭang a ni.
Read More: Isua Ang Lo Turin
Chutiang khawpa pawimawh si chu khuarel pawimawhna erawh kan hlamchhiah em em a, kan ropuina leh kan mawina tur daltuah kan ngai tlat a. Kan in leh a chhehvela thing kung te pawh hnawk kan ti sam em em a, kan thianfai zung zung zel a nih hi. Tin, kan hnawmhnawk chi tin hi nature ti chhe tur khawpin kan thehthang a, tuifinriata oil chhia kan khawh luhtir zut zut dan te, kan bawlhhlawh chi tin lui leh kawra kan vawm luh zung zung dante hi a rawn tarlang a ni mai ang em? Puanin chhunga hmeichhe pawisawi lo lo ṭhu khar kha mother earth kan tih fo ṭhin sawina kha a lo ni reng ang em?
Lalzuahliana hian eng nge a sawi tum tak tih khawiah mah a la sawi chhuak loin ka hria a. A poetry te pawh a awmzia an zawhin a sawi ngai chuang lo a ni awm e. A ziaktuin ziah chhuah a tum tak phei chu kan va hriatsak rual a ni lo nain a chhiartu lamin kan lo hriatthiam leh dawnsawn dan hi a pawimawh lai chu a ni a. Tuna kan sawi lan loh pawh hi a chhiartu a zirin hriatthiam dan dang tam tak a la awm thei ngei ang.
Read More: Indian National Movement
Comments
Post a Comment