Kawlkil Piah Lamtluangah Zawlaidi - Natalia

Mizo novelist zinga hnial buai vak ngai loa a ṭha ber nihna hauh nghet deuh tawptu C. Lalnunchanga kutchhuak hrang hrang hi chik leh belhchian dawl tak tak vek a ni a. Amah hre ngai lo ṭhenkhat awm bawk mah se Mizo lehkhabu chhiar ṭhin zingah chuan hre lo tak tak a awm theih loh hial ang. A novelte hi a mala thlan chhuah tlak ṭhiau ni mah se a tharlam ber Kawlkil Piah Lamtluang hi kei chuan ngaihnawm ka ti ber a, ka dah sang ber bawkin ka hria.

Kawlkil Piah Lamtluang hi kum 2005-a ziah ṭan daih tawh ni mah se mipui chhiar theih tura a chhuah chu kum sawm hnu kum 2015-ah a ni. A inup rei ngat ngat bawka thawh pawh a tho ṭhain a thlum tui dep dep hle. Mizo novel zinga kan la hmuh tam loh fantasy huanga khung theih tur a ni a, a tak pawha awm thei lo tur thil mak tak tak inphumna leh kan khawvel hriat ngai loh khawvel thar min fantirtu a ni.

Read More: Zuahliana Thawnthu

A thawnthu tlangpui chu hmangaihna avanga hliam tuar, a hmangaihin a phatsan avanga ram mu ve ta Vala'n amah hliamtu laka phuba lakna/amah kalsantu neih let lehna tur atana zawlaidi a zawn dan leh zawlaidi zawnga khawvel lehlam, khawvel dang daih a fan dan leh chumi rama thil hrang hrang a tawn dan a ni ber.

A zawlaidi zawn chu tu thinlung pawh hneh theihna leh hmangaihna pathian nu afrovie thlarau tanna lung dum emaw saaya-stone emaw ni maiin a lang a. Mahse Kawlkil Piah Lamtluang ka chhiar ka chhiar hian kha zawlaidi tak tak kha Vala(Valha) zawn tak tak zawk zawlaidi kha ni lo tlatin ka hre thar.

Kawlkil Piah Lamtluang-a a changtupa ber Vala chu pasalṭha thei ber niin hriak thih pasalṭha dinhmun ropui tak chang thei meuh ni mah se a nun a ruak ru tlat a, ropuina leh hnehna tam takin vur ṭhin bawk mah se a nun a chawl thei tak tak lo a, a nun khan muanna a chang ngai lo. A hmangaih Muanteii thinlung neih letna tur zawlaidi zawnga kal ni mah se a tak takah chuan a nun ruak hnawh khahna tur leh chawlhna tak tak a chan theihna tura zawlaidi zawng lek a ni zawk a. 

Read More: All the lights we cannot see

Chu chawlhna a zawn ṭhin leh muanna a um ṭhin chu thawnthua zawlaidi tak tak zawk lung dum a hmuh hma daihin a tawng a, muanna nei ve thei lo leh buainain a rawn zawn zel ṭhin pasalṭha khan zawlaidi, saaya-stone a hmuh hmain muanna famkim leh chawlh hahdamna tak tak a tawng tawh a ni. 

Orvu lui ruamah, pasal sun tawh nuthlawi nun nem Natalia kiangah khan pasalṭha khawharin a zawn tak tak zawk chawlhna leh muanna chu a hmu a. A thinlung hliamtu Muantei vangin thui tak a tlan a, mihringte dai ngai loh leh a awm tih pawh an hriat ngai loh khawvel hial dai lutin, chu khawvelah pawh chuan a la tlan zel a. Kawlkil thleng rawkin chawlhna a channa tur chu a um zel a ni. Tichuan Natalia hnen a thleng a, 'tunah chuan khang ka nun hlui duhawm lo tak tak kha vaivut anga len bo a ni a. He hlimna lui ruamah hian nun thar chu ka chhar a, an nui ri chu ka thinlungin a zawm ve thei ta. Ka nun ka han ngaihtuah a. Pawm thiam a harsa deuh pawh a ni mai thei; mahse, duhthusam anga duan a ni a. Tu mahin ka chhungrila nun hi an lo la tlawh ngai lo reng reng a, tunah chuan Natalia-i'n a rawn hawng ta a ni' a tih theih phah hial ta a ni. 

'Kawlkil tawpah sawn eng nge awm tih hriat tumin ka pan a, ka pan zel a, tunah chuan he lui ruam hi ka lo thleng ta a. Ka rawn kalsan taka lui leh tlang te, khawpuiah te khan tu mah min chelh zo an awm lo va, ka la kal lohna hmuna kal zel chakna pawh ka nei tawh lo. Ka thinlung chu a neitu hnenah a awm a; Natalia, he hmunah hian ka hlim a ni' a ti bawk. 

Read More: Isua Ang Lo Turin

Chutianga chawlhna leh hahdamna a channa chu a zawn zawlaidi, lung dum a hmuh vang ni loin a thinlungin a zawn zawlaidi tak tak a tawn tak vang a ni. 

Mahse a thinlung chhungrilin a zawn chawlhna chu hmu tawh mah se pasalṭha nun kha chawl hlen tura duan a ni lo a, muanna pawh chatuan daih nei ve tura ruat a ni hek lo. Chuvang chuan a nun hlimna chu lak bosak a ni leh thuai a, pasalṭha nun kha ruak reng tura duan sa a nih avangin ruak hnawh khattu Natalia chu a liam leh ta mai a ni. 

Mi dangin min pawmpui ang em phei chu ka hre lo a, khatia Natalia a thih tak hnu khan a thawnthu kha a ruak huaiin ka hria a, Natalia thih hnua thil thleng hrang hrang pawh kha a hming chauha thleng ve mai mai a ang riau tawhin ka hria! 

Mihring nun hi chawlhna leh hahdamna zawngin a tlan a, sum leh paiah a ni emaw, nihna leh ropuina a ni emaw, hmingthanna a ni emaw chawlhna kan zawnna thil vek a ni a. Sakhua meuh pawh hi a tak takah chuan kan nun hahdamna tura kan duan a ni. Mahse kan phak ang tawk leh kan thiam dan ang angin chawlhna chu zawng ve mah ila, chawlhna chu kan chang kher ang em? Lo chang ta tehreng pawh ni ila kan nun hi a chawl hlen thei ang em? Kawlkil Piah Lamtluang-a Vala ang khan chawl thei ngai lo tura duan kan lo ni reng ang em? 

Read More: Indian National Movement

Natalia 

Kawlkil Piah Lamtluangah khan pasalṭha huaisen kha
Chhungrila nun khawharnain a luah a,
A nuna ruak hnawh khahna tur a zawng ṭhin.
Thahrui rinchhana hnehna puang ṭhin kha
Chauin a zuai a, chawlhna tuikam thlen tumin
A chakna a sawm khawm hram hram ṭhin.
Hringnun zinkawng bumboh a zawhnaah khan,
Chhim thlipui hrangin ding hlei thei loa a nuai nawk nawk lai khan, 
A mamawh chawlhna chu hmuhtir a ni a,
Nun ruak kha chhun khah a ni a,
Hahdamna siktui thiang tulh a ni–
Nun nem Natalia kiangah a zawn pialral chu a chang ta.
Mahse Natalia chu a tana nung reng tura ruat a ni lo a,
Pasalṭha nun ruak lah ruak reng tura duan a ni si! 

Natalia chu a liam ta a, amaha bet hlimna leh beiseina pawh
A liampui ta a...

Read More: K. Hminga Mihrinna