AOC – US Thenhrangtu Nula Chu

Khawvela ram ropui ber anga kan ngaih leh Mizo tam tak phei chuan a dik a dawk thlu loa kan lo ralkhat ṭan ve em em United States of America mipui ngaihdan \henhrang hlawktu pakhat chu Democratic Socialism chungchang a ni. USA chu capitalist ram ropui, a theihtawp chhuaha communist ho lian tur dotu leh socialism chi pawh rah hrual vek duhtu ramah chuan tihbo an tum socialism chuan kua a hreuh hret hret a, USSR leh Cuba te socialism kalpui ang ni lo, Norway leh Denmark te kalpui dan zawk, democracy chhunga socialism kalpui duhnain mi tam tak rilru a luah a. Chumi chungchangah chuan a duh lam leh hmu sakei tlat pawl an in\hen phawk a, politics huangah pawh ngaihdan a hrang ta nuai mai.

Democratic Socialism duhtu langsar zingah chuan President chuh tuma inthlan lailawknate pawh lo bei ve \auh \auh tawh Bernie Sanders te hi a langsar pawl an ni a, mahse \halai zawk leh mi nawlpui zinga huhang nei ber pakhat chu nula, kum 2018 kum tawp lama khawvelin a hriat \an chauh, politician hmel thar, danglam leh dangdai tak, Alexandria Ocasio-Cortez, a hming lam tawi AOC ti-a hriat bawk hi a ni.

Kum 2018 midterm election dawnah khan New York 14th Congressional District Democrats candidate tur zawnna(primary)-ah term sawm lai lo tling tawh leh Democratic Caucus Chairman Joe Crawley hnehin khawvel a barakhaih a. Inthlan tak takah pawh awlsam angreng takin a chak chho tlang a ni. Hetia a tlin hian kum 29 mi chauh a la ni a, hmeichhe zinga United States Congress Representative ni thei naupang ber a ni.

US politics khalh kawitu ber pakhat corporate funding dawng miah lo leh sum pawh hmang em em lo, bar nghaktu aṭanga tling thei a nihna hian a hnaah leh a chet zui zel danah pawh phuartu a nei ve lo a, Congress-a a thusawiah te pawh a hriam thei hle a ni.

Kum 1989 October ni 13 khan Bronx, New York-ah Catholic chhungkua aṭangin a lo piang a, Boston University College of Arts and Sciences aṭangin international relations leh economics-ah a graduate a ni. College a kal laiin Senator Ted Kennedy hnuaiah intern tiin a thawk zuai a, kum 2016 US President inthlan dawnah khan Bernie Sanders tan Campaign Organizer angin ṭhahnem ngai takin a lo bei ve tawh bawk a ni.

AOC hi democratic socialist a ni a, a thupui ber pawh mi rethei leh hnuaihnung zawkte hmasawnna lam a ni a, mi zawng zawng tana health care hman tlak siam te, tu pawh ni se, eng mi pawh ni se a thlawna zirna ṭha dawntir, mi zawng zawng tana sum lakluh ṭha tawk tak buatsaih( 50 dollar minimum wage) leh mi hausa tawn taw(millionaire) hnen aṭanga chhiah sang tak lak tih lam te a ni a. Legislator a nih anga a bill putluh hmasak ber pawh climate change chungchanga hmalakna tur Green New Deal a ni.

Amah a la naupang bawk a, ṭhalai lam lawm a hlawh zual hle a. Chutih rual chuan ṭan lem lo leh duh lo tak taktu pawh an awm ve ṭeuh tho bawk. Social media hmang ṭangkai ber pawl leh social media-a politician lar ber pawl a ni a, Twitter-ah 7.3 million followers lai a nei a ni.

Tunah hian Committee pawimawh tak tak Committee on Financial Services, Subcommittee on Investor Protection, Entrepreneurship and Capital Market, Subcommittee on Consumer Protection and Financial Institutions, Committee on Oversight and Government Reform, Subcommittee on Civil Rights and Civil Liberties, Subcommittee on Environment ah te a tel mek a ni.

Sumin nasa taka a thunun US politics-ah sum tel mang loin a ding chhuak a, mi hausa leh dinhmun sang zawk mi tlemte te chauh ngaihtuah loin mi hnuaihnung leh dinhmun hniam zawkte chawisan tum tak takna nena thawk a ni a, amahah beiseina pawh a sang sawt viau a, President te pawh chuh chho thei thuai tura ringtu pawh an tam tawh hle a ni.