Skip to main content

Kan Khaw Thlanmual

Image
By Ramlawt Dinpuia,
Mizo Digest

Kan khaw thlanmualah chuan pangpar kan phun ṭhin. Mual liam ta kan hmangaihte thlan kha mawi takin pangpar chuan chei se kan ti a, thlan hrang hrang i enkual a nih pawhin pangpar a lo vul chuk hlawm ang.

Kan khaw thlanmual chu khaw dang thlanmual ang thoin mitthi phumna hmun a ni! Pialral kawng zawh tura kan hmangaihte kan vui liamna hmun a ni a, vaivuta kir tura vaivut kan zalhna hmun a ni. 


Chu hmunah chuan fam hnu ngaiin kan ṭap fo a, chu hmunah chuan koh hre tawh lo kan au lawm lawm ṭhin. Thinlung keh chhia lo dawmtu a ni a, dan rual loh mittui lo dawngtu pawh. 

Kan khaw thlanmual chu lungngaihna hmun a ni a, hlim nui ri aiin ṭah hla hriat tur a tam zawk. Chu hmun chu beidawnna hmun a ni a, chutah chuan beiseina pawh phumin a awm ṭhin. 


Kan khaw thlanmual chu, a luahtuten na hre thei tawh lo mah se natna hmun a ni a. Na tuara rum ri hriat tur a awm reng a, zingah a ni emaw, chhun pachangah pawh ni se la damna a awm chuang lo. Thla eng hnuaiah pawh hmangaihna par vul lai aiin thihna nunrawng vanga hmangaihtu nun inbunruak tawn tur a tam zawk.

Mahse kan khaw thlanmualah chuan pangpar kan phun ṭhin. Mual liam ta kan hmangaihte thlan kha pangpar chuan mawi takin chei se kan ti a, thlan hrang hrang i enkual a nih pawhin pangpar a lo vul chuk hlawm ngei ang.

Lungngaihna hmunah pawh mawi takin pangpar chu an par a, thinlung hliam a nihna hmun ni mah se pangpar chuan par an ṭhulh ngai lo. Chawl loa ṭah hla chham niin lawm avanga nui ri hriat tur awm lo mah se, beiseina eng zawng zawng pawh tihthim ni ṭhin mah se la, chu hmunah chuan pangpar a vul ṭhin!


Mawina hi hlimna nen chawhpawlh a ni a, mawina hi hlimna vawrtawpah kan ngai ṭhin. Mahse lungngaihnaah pawh mawina a awm tho a, natna hmunah pawh mawina hian chanvo a nei tih kan hre lo! 

Beisei tur a awm tawh loh a, beidawnna chauh kan nun roreltu a nih hnu pawhin pangpar chu mawi taka vul turin kan la phun thei tho a, hliam tuara kan rum a nih pawhin, kan lungngaih mittui nen pawh hian thil mawi, thlirtu mit titlai tur leh hahdamna thlentu tur kan la siam chhuak thei asin.

Indona rapthlakin a ṭhawn darh hnu Arab ram hoah khuan, grenade puak tawh kawr ruakah nu hoin pangpar an ching ṭhin an ti a. Chhiatna nasa tak thlentu leh nunna tam latu kha, pangpar thianghlim nunna petu leh mawi taka vultirtuah an chantir a nih chu!


He article hi ngaihnawm i ti a, i hlawkpui emaw i ṭangkaipui emaw a nih chuan khawngaih takin blog hi min subscribe sak ve la, article ṭangkai leh ngaihnawm tak tak i lo hmu ve zel dawn a nia. 

Labels:

Comments

Post a Comment

Popular posts from this blog

Mizo Novel 3 - C. Lalnunchanga Kutchhuakte

By Ramlawt Dinpuia,
Mizo Novel 3 kan sawi tur hi ṭhenkhat chuan Mizo novel zinga a ṭha ber pawlah an ngai maithei a, Mizo novel chhiar ṭhin chuan kan chhiar vek tawh hial ang. Heng Mizo novel 3 kan sawi tur hi mi pakhat kutchhuak a ni a, a mal mal pawha sawi fe tham ṭhiau an ni. Tunah erawh chuan mi pakhat kutchhuak a nihna leh Mizo novel zinga mi chhiar hlawh leh ṭha ber zinga mi a nih angin khaikhinna leh sawi zauna tawite neih kan tum dawn a ni. Mizo novel chhuak tawh zingah a ṭha ber thlang dawn ta ila mi tam takin kan thlan ṭhum tur Pasalṭhate Ni Hnuhnung, Ruamrai Thuruk leh Kawlkil Piah Lamtluang te hi C. Lalnunchanga kutchhuak an ni a. Tuna kan sawi bakah hian Pasalṭhate Ni Hnuhnung prequel Ka Mi Huaisen leh Ka Pasalṭha a ziak bawk. Heng novel ngaihnawm tak tak pathum zinga pahnih Pasalṭhate Ni Hnuhnung(2006) leh Kawlkil Piah Lamtluang(2015) te hi an chhuah kum ve veah Mizo Academy of Letters(MAL) chuan Mizo ṭawng lehkhabu chhuak zinga ṭha ber(Book of the Year)-ah a thlang nghe nghe a ni. Read Mor...
2 comments
Read more

Kawlkil Piah Lamtluangah Zawlaidi - Natalia

By Ramlawt Dinpuia,
Mizo novelist zinga hnial buai vak ngai loa a ṭha ber nihna hauh nghet deuh tawptu C. Lalnunchanga kutchhuak hrang hrang hi chik leh belhchian dawl tak tak vek a ni a. Amah hre ngai lo ṭhenkhat awm bawk mah se Mizo lehkhabu chhiar ṭhin zingah chuan hre lo tak tak a awm theih loh hial ang. A novelte hi a mala thlan chhuah tlak ṭhiau ni mah se a tharlam ber Kawlkil Piah Lamtluang hi kei chuan ngaihnawm ka ti ber a, ka dah sang ber bawkin ka hria.
6 comments
Read more

Mizo Sermon : Kan Dam Chhan

By Ramlawt Dinpuia,
Hranghlui zaithiam C. Vansanga hla pakhat lar thar leh em em  a awm a, chu chu ‘Kan Damchhan’ tih kha a ni. Aw eng a’n nge maw Khuanu hian Hringnun hi a lo duan le? Thamral leh mai tur hian em ni le? Duh vang rengin kan piang si lo. tiin mihringa zawhna awm leh mihringte rilru tibuai fotu zawhna lian tak kha hla hmangin a rawn puang chhuak a. Engvangin nge he khawvelah hian ka lo pian chhuah ve ringawt a, engvangin nge he leiah hian ka lo awm ve? Ka nun hian eng nge awmzia a neih a, kan nun hian eng hlutna nge a neih ve le? Dam reng hian awmzia a nei meuh em ni? tih inzawtin nun awmze hriat lohna a hring a, chu chuan mahni nunna pawh hlut zo tawh lo turin min hnuk lut a, thalai tam tak an nunna titawpin mual an lo liam ta a ni. Vawiina la dam hram hram keini zingah pawh hian existential crisis an tihin a bawh buai eng emaw zat kan awm ngei ang. Nun hi eng nge maw a awmzia le? Nunna hi engvang nge maw a lo awm ve ringawt le? Thamral leh tur ringawt hian em ni kan lo awm ...
Post a Comment
Read more