Thunderbird 4: Vanneihtluanga Beidawnna Piah Ram

Red Indian hnam ṭhenkhat rin danah chuan ṭek leh khawpui hi van lam thuneitu, sava lian tak mai(thunderbird)in a thlentir a ni a. Chu sava chu sava satliah ni loin ni pathian tirhkoh a ni a, a thla khawng ri chu mihringin khawpui ri kan lo tih hi a ni, an ti. Khawpui a rik dur dur a, ṭek a tlak zuai zuai tawh chuan a zamawm rum rum zel a, thil ṭha aia thil ṭha lo thlentu angah kan ngai zawk ṭhin a nih hi.

Mafaa Hauhnarin leilung pian tirh aṭanga vawiin thlenga Mizo short story phuah zawng zawng zinga ni leh thla kara leng, tu sai thlak mai mai loh tur a tih pahnih zinga pakhat zawk, Vanneihtluanga short story 'Thunderbird' hi Mizo thuziak chhiar ṭhin zingah hre lo an awm kher lo ang. Mi eng emaw zatin thlirna hrang hrang an ziak tawh a, kum tam a liam hnu pawha kan la zir tluk tluk tur a ni bawk.

Read More: Artui Pum Thum

Zirlaibua seng luh a nih dawn khan a thupui Thunderbird tih hi Beidawnna Piah Ram(hemi link atang hian You Tube-ah a ngaihthlak theih) tiin thlak ni mah se Thunderbird kha a thawnthu laimu pakhat a nih miau avangin eng nge Thunderbird tak chu ni ang? tih zawhna a awm lo thei lo a. A thawnthu chhiar chuan chhanna awlsam tak niin lang mah se Thunderbird kha pakhat chauh a awm lo niin ka hre ṭhin.

A thawnthu tlangpui sawi chhawn ve leh emaw, kan khawtlang nun a tarlan chian dan lam emaw sawi loin Thunderbird pali sawi kan tum zawk dawn a ni.

Thunderbird Pakhatna

Thawnthu sawitu pa ber leh a changtupain sawisak a tawh hnu, damna zawnga a pan phai lam damdawi in ṭha aṭanga beidawnga a lo haw hnuah, a dam chhung hun chu nawrhlirh ṭhutthleng aṭangin a chhiar ṭan a. A fapa te zawk, engmah la hrethiam lo khan a pa ṭhutna lir thei chu a awt em em mai bawk a.

Hrehawm ti tak chunga a chuanna nawrlirh chu a fapain a awh em avangin thirsakawr lei a ngen a. Mahse leisak thei tur khawpin an chhungkaw dinhmunin a zir lo nasa mai si. A ṭhat laia a leisak thirsakawr hlui siamṭhat an tum a. Chu thirsakawr hma lamah chuan Thunderbird tih a intar nghe nghe. Thunderbird pakhatna chu.

Siamṭhat an tum thirsakawr kha an tichhiat belh zawk hial avangin, chu Thunderbird chu khawpui rapawm leh chhiatna thlentu a ni.

Read More: Nunna Hlu Bik A Awm Em? BLM Vs ALM

Thunderbird Pahnihna

Thunderbird pakhatna, thirsakawr hlui an siamṭha thei ta si lo a, pa ber tih ngaihna hre lo chuan, 'Ngawi tak rawh, Valte, ka chuanna nawrlirh ṭhutthlengah hian Thunderbird tih hi tar ila, ka dam veleh a ṭhutthleng chawp hian i nei dawn nia' a ti ta ngawt a. Chuta ṭang chuan lalṭhutthleng nunrawng chu Thunderbird tih a ni ta a ni.

Ni chhuah rualin khum aṭangin a nupuiin a tung tho a, Thunderbird-ah nghatin a faten an nawr kual a. Mi dangin an chhuahsan vek hnuah pawh Thunderbird phuarna chu chhuahsan ve thei a ni lo a, Thunderbird-a ṭhu chungin ni a leng ṭhin. Chu Thunderbird pahnihna pawh chu lungngaihna thlentu mai a ni. Beidawnna a ni a, natna a ni bawk.

'Ka pa, naktukah chuan i dam tawh ang a, Thunderbird-ah ka chuang ve thei tawh ang ti raw?' tih zawhna zawt chhen mah se damna naktuk chu a thleng thei si lo! Mihring danah Thunderbird aṭang chuan tho chhuak leh thei tur a ni lo a, Thunderbird pahnihna chu mihring tithlabar tura khawpui leh ṭek thlentu ringawt ni loin khawpui leh ṭek chu a ni. Mi vanduai vanduaina tizual tura tawp loa sawisatu a ni, Thunderbird pahnihna chu.

Read More: Kan Khaw Thlanmual

Thunderbird Pathumna

Eng luh lohna pindan thimah chuan Van Tukverh a lo inhawng a. Thunderbird pahnihnaah ṭhu chunga mihring siam chawp ropuina leh thiltihtheihna a thlir nin hnuah, beidawng taka van dum pawl a thlir ṭan hnu chuan vamur pathum an lo thlawk hnai a. Rei vek loah pakhatin a rawn fin ve bawk. Thunderbird pathumna chu mihring kutchhuak ni loin Siamtu'n uluk taka a duan sava an ni ta.

A tirah hmuhnawm ti takin vamur che vel chu thlirin, an zalenna te pawh ṭawm hman mah se ni khat chu, lungtiawitu ni loin, a dinhmun thawpikthlakzia lantirtuah a ngai ta thut a! Zalen taka an thlawk velte chuan a vanduaizia kawhhmuhin an elsen a, a natzia an hrilh dawt dawt niin a hre tlat a! Thinrim insum hman loin thlawk bo rang turin a vin ta chiam a nih kha.

Chutia nasa taka a hauh hnu chuan vamurte chu an bo ta diak a, an lo lang ta mai tlat lo. Mak tak maiin a ngai ru riau lehlawi si. Thunderbird pathumna an lo lan aṭang khan a vanduaina te, a hmaa a ngaihtuah reng reng mahni intihhlum lam reng reng a ngaihtuah tawh ngai lo tihte a hre chhuak a. A hnawh bo hnuah an hlutna a man thiam chauh a ni.

Beidawng taka a nghah thlawn hnuah an lo lang ve leh mial a. Thunderbird pathumna nen chuan Siamkima Zalenna Ram te, Keivoma Zoram Khawvel te an sawiho a, van boruakah thlawh kualpuiin tem tawh ngai lo tura a inngaih zalenna pawh Thunderbird pathumna chuan an temtir hial a ni.

Mahse sik leh sa a inthlak a, vamur thlawk hmuh tur an awm tawh lo. Beiseina leh hahdamna thlentu ni mah se Thunderbird pathumna pawh chu an bo ve leh a!

Read More: Pangpar Lar, Hriat Chian Si Loh - Zan Lalnu

Thunderbird Palina

Vamur an thlawh bo zawh hnu chuan Van Tukverh aṭang meuh pawhin sava thlir tur an awm ta mang lo a. A kawm phak awm chhun chu sava azawnga sava nep ber chawngzawng chauh an ni ta!

Chawngzawng rual zingah chuan chuam bik pakhat a nei nghe nghe a. Mak tak maiin chu chawngzawng chuan a hmuh phak tur ngeiin bu a chhep a. A thlirtu tan pawha hahthlak khawpa zei lo leh remhre lo a ni lehnghal! Chu chawngzawng chuan tih theih loh anga lang tih a tum a, mihringin a tlawmsanna hmunah pawh a tlawm ve mai mai lo! Sava tlawm leh nep ber ni mah se nawrhlirh ṭhutthleng thawhsan thei lo mihring kha zirlai zirtir tur a lo nei reng chu niin.

Thunderbird palina chuan indona hmunah a hruai lut a, tho chhuak tawh ngai lo tura mihringin an ngaih kha ding turin chakna a pe a, tlawm tawh kha hnehna a chantir ta hial a ni.

Thunderbird palina chuan mihring tana chhiatna khawpui leh ṭek a keng tawh lo a. Leilungin chi a chhuah leh theihna tura malsawm ruah rawn kengtu a ni zawk. Thunderbird dang chuan beidawnna, natna, lungngaihna rawn thlen mah se, Thunderbird hnuhnung ber chuan beiseina, damna leh hlimna a rawn thlen thung a ni. Thunderbird tak tak chu.

Read More: Hagia Sophia A Chim