Pitar

Khatlaah chawhmeh zuarin a ṭhu ve ṭhin a. Chawhmeh zuar dangho ṭhut vak ngai lohna lamah a fal deuhin a ṭhu ṭhin. Office haw pahin ka dawr ve fo a, nu fel tak a nih ka ring. A thil zawrh a ṭhat bik vang emaw, a zawrh tlawn deuh bik vang emawa dawr ṭhin ka ni lo. Ka dawr fo chhan zawk chu a ṭhutna laiah khan din a rem deuh vang mai a ni.

Chawhmeh dah ṭhatna tur fridge kan neih loh avangin han inlei khawl chiam a rem lo a, vawi khatah tlemte te leiin ka dawr zin phah hle. Chuvang chu a ni maithei, mi lo chhinchhiah ve a, a chang chuan hmarcha eng i lo mi pe ṭhin. Hmel hlim sangin tu pawh mai chu a chhawn vek thei a, nu nelawm tak niin ka hria. A i hralh ṭhat leh ṭhat loh te zawtin ka titipui ve zauh zauh ṭhin a, hlawk viau ni lo mah se ei khawp na na na chu a lei ve theih ṭhin thu min hrilh.
 
A chawhmeh zawrhnaah hian kum 10 mi vel tur hmeichhe naupang pakhat hian a pui ṭhin a. A fanu a nih ka ring. A nu hnathawhnaah chuan theih ang angin a lo pui ve a, naupang fel tak, a nulat huna nula hmelṭha tak la ni tur a nih ka ring.
 
Hri a lo thlen a, kan buai tak luih luihah khan office-ah sanitizer siamna tur lab kan buatsaih a. Sorkar office leh ṭul hrang hrangah supply kualin kan chhawr ṭangkai ve hle. Lab aṭanga kan sanitizer siam chu chawhmeh zuar nu kha ka pe ve a, a lawm thiam khawp mai. Mahse chawhmeh mi pek ziah a tum a, a nuam lo letling ṭhin.
Chuta ṭang chuan kan innel lehzual a. Ka ban hma theih deuh ṭum phei chuan a inzawrhna bulah ṭhuin ka pui ve ṭhin.
 
Amah chu Pi Kim tiin ka ko ve mai ṭhin a, mi dangin an koh ṭhin dan pawh a ni. A fanu emaw ka tih char char kha a fanu ni loin a tunu zawk a ni awm e. Min hrilh dan chuan Champhai District-a thingtlang khaw pakhat chhuak an ni a. A pasal thih hnuah tuna a tunu hi a nuin a pai laiin Aizawlah a pem thlakpui a ni awm e.
 
Kum sawm chuang zet chu Aizawlah hian an awm ve tawh a. Thawh theih leh thiam dang nei ta lo chu chawhmeh zuar hian a inhlawh ve ṭauh ṭauh a, a fanu chu mi inah awmin a inhlawh ṭhin bawk. Chutianga rim taka an thawh avang chuan nghei loin an la awm ve zel a ni.
 
Sorkarin lockdown a han puan leh khan engtin nge an awm ang aw tiin ka ngaihtuah fo a. An mahni biak pawh theihna tur emaw an veng emaw ka lo hre si lo a, rilru an luah ang reng khawp mai. Tih theih vak nei chuang si loin mut dawnah te ka ṭawngṭaipui ve leh ringawt ṭhin.
 
Sorkarin dawr hawn theih ni a siam a lo thleng a, mamawh ang ang lam turin ka chhuak ve a. A hmaa khawlai a reh ṭhin tehreng nen mamawh lam tura chhuak kan tam khawp mai. Kan zi deuh hut hut a ni ber. 'Ni khat chauh nazar hun siam hi a fuh lo' tih an sawi ṭhin te kha ka ngaihtuah a, an sawi ang hian a fuh vak lo nge mawni tih te ka ngaihtuah a. Mahse chung chu ka lo sawi ve tur pawh a awmin ka hre lo. Thuneitu lam tan pawh rorel a har dawn em a ni.
 
Pi Kimi ṭhutna ṭhin chu ka va pan a, mi pali ngain an lo bawr ve laih laih a. Ka duh aia an tam avangin ka pan hnai lawk ngam lo a, a sir deuh aṭangin ka thlir a. Chawhmeh pawh a ngah tawh lo hle. Pi Kimi tak chu ka va hmu mai thei lo a, hmun dangah a kal lawk emaw miin an hliah emaw a ni maithei.
 
Dawrtu an rem deuh hnuah chuan ka va pan hnai a. Pi Kimi chu a lo awm lo tak tak a, a tunu te kha a lo ṭhu a. A tunu pawh chuan mi lo la hre ve a, eng nge ka duh te min zawtin mi lo be siam siam a.
 
'Khawnge i pi?'
 
'Inah.'
 
'Ngatinge?'
 
'A dam lo a. Nangmahin chawhmeh han zuar mai rawh min ti a.'
 
'A va zia lo ve. A dam lohna a rei tawh em? Engtin nge a awm?'
 
'Nizan hmasa aṭang khan a ke na a chhuak a. Kuah loh chuan chet pawh a che thei lo. A mu char char.'
 
Pi Kimi chu nerve ṭha lo nei a ni awm e. Doctorin zai tur an ti tawh a, mahse inzaina tur an neih loh avangin a lo pal mai mai a ni.
 
'I nu i hrilh em?'
 
'Aih. Hrilh lo.'
 
'Ngatinge?'
 
'Anu chu ka hrilh thei tawh hleinem. A thi tawh a.'
 
Ka thu hriat chuan mi deng dawt a. Pi Kimi khan la dam angin min hrilh khan ka hre si a, mak ka ti ngei mai.
 
'Nikum khan a dam lo vak a, chuan a thi daih a lawm. Api chuan vanah a kal tawh a, min lo thlir reng ṭhin a tia. Mahse ka awih vak lo. Anu chuan min kalsan a ching hrim hrim a.'
 
Khua a tlai dawn tawh a. Veng chhung tlangauna aṭangin dawr khar a hun tawh thu leh inkhar tura ngenna an lo puang dum dum a. Dawr an inkhar kim hmaa lei tur dang ka la neih avangin ka kalsan a. Ka kalsan dawnah ka pawisa ah aṭangin ka thil la lei leh tur daih tur bak zawng ka pe a, ka kalsan ta a. Ka pawisa pek kha eng tham mah a ni lo tih ka hria. A chhan chu kan hlawh ve ang ang pawhin kan mahni ei leh in a daih ngawr ngawr a ni ve si a.
 
In ka thlen hnu pawhin Pi Kimite chuan rilru an luah ta reng a. Engtin nge an awmzui ang tih ka ngaihtuah a, an nghei em lohna tur leh a dam leh thuai theihna atana ṭawngṭaipui bak tih theih ka nei si lo.

Lockdown khirh ber lai pawha nghei loa kan awm hi kan vannei takzet a. Mahse keini anga vannei ve lo hi eng zat tak awm ang maw?

Read More : Thlalak