Pi Zapi

Pi Zapi chu kan khuaah rau rau pawh veng tlabirh lama awm a ni a. Vengthlang hmeithai pitar an tih ṭhin kha amah ngei hi a nih ka ring. Ka hriat theih chin aṭangin tuna a awmnaah hian a awm tawh a, chhungte emaw chi leh kuang han ngaihsaktu emaw a neih awm reng reng ka hre ngai lo. A kum zat awm leh a hming pum pawh hria an awmin ka hre lo, tu mahin an sawi ngai lo.

Tuna a in pawh hi YMA-in kan saksak a ni a, amah tein tihian a khawsa ve rek rek a. Rual a pawl tam lo khawpin ka hria a, a rualpawl vena ber chu inkhawm hi a ni deuh mai. A dam ṭhat phawt chuan inkhawm a ṭhulh ngai lo a, a lo inkhawm loh hlek erawh chuan a dam lo tihna emaw a ni mai a, kohhran upa ten ngaihsakin an tlawh chhuak vat ṭhin.

Chhun lamah hian inah a awm ngai lo khawp a, a in chu thingfakin a do a, Pathianni tih lohah chuan a feh nitin ṭhin. A feh han ti hluai ila, chhungkaw dang anga lo nei erawh a ni lo. Thlanmual ram kang a hreng a, chutah chuan thlai leh anhnah chi hrang hrang bakah vaimim leh fanghmate a ching a. Chumi enkawl chuan nitin a feh ṭhin. 

A taimakna Pathianin mal a sawm nge ni dawn ni, thlai a nei ṭha thei phian a. A ei khawp a tam lo bawk a, hralh chhuah tham a thar ve ṭhin a. Chung a thlai hralhna bakah chuan ni za inhlawhna te nen ṭangkawpin khawsak harsa lutuk chu a ni bik lo a. Mak deuh chu sawma pakhat pawh a pe tam pawl a ni ve ziah ṭhin, a ti ka pain. Ka pa hi an veng lam bialtu upa a ni a, thawhlawm khawn leh eng iloah a tlawh fo a. Chuvang chu a ni maithei keini pawh min tichhungkhat ve a, a thlai thar apiang min pe ve ziah a, leisak kan tum lahin pawisa a la duh ngai bawk si lo. 

Khatia hripui a lo len a, ram pum kan inkharkhip rup khan kan khua pawhin thingtlang khaw dang ang thoin kan han hlau ve mai mai khawp a! Khaw kawtchhuah leh dai vel zawng zawngah gate siamin chhun zan zawmin kan duty tluk tluk a. Khawpuia zirlai awm ang chi pawh an lo haw kan han phal lo deuh rup a! Mahse haw phal loh reng thu a awm lo a, tin, ngaiah kan nei ta deuh pawh a ni ang a tir ang em em chuan kan hlau tawh lo a, zirlai leh khawpuia awmte pawh an lo haw ta sup sup a. 

Kan khua hi Aizawl district-a awm kan ni a. Khaw lian kan ni lo a, in 300 bawr vel lek kan ni. High sikul pakhat kan nei ve a, a aia sang erawh zirna kan nei lo. Khaw dang ang thoin kan khaw mipui tam zawk eizawnna chu lo neih a ni deuh mai a. Ram a lo bua zel a, kham khawp thar erawh a har ta hle. Ranvulh emaw eizawnna dang eng eng emaw dap han duh viau ṭhin mah ila a bulṭanna lai tak hi kan harsatna a ni zel a, a hlawk lo tih hre reng chunga kum tin ram ṭheh a, lo neih bak tih theih vak kan nei lo. 

Keini chhung tak hi chu thingtlangah rau rau chuan a nei ve pawl tak kan ni zawk a. Ka pa hi tun hma chuan VC hlun ṭhin a ni ve a, huan nghet neiin sanghal dil te kan nei a, chhungkaw pangngai tak chu kan ni ve. Ka nu leh pa ṭhahnem ngaihna avang liau liauin BA ka zo ve a, kan khua angah chuan BA zo hmasa ber ka ni hialin ka hria. Ka zir zawh hnuin kan khaw high sikulah hian ka thawk theih hlauh bawk a. Ka pa hnung zuiin kohhran leh khawtlangah phak ang tawkin ka inhmang ve a, tunah hian YMA OB ka ni mek nghe nghe. 

Sorkarin hri do pawl a dinah pawh YMA zawn aṭangin ka tel ve a, a tirah han hlau viau mah ila khawpui tlawh pawh tam lo keini khua ang aṭang chuan hlauhawm lutuk a awm lo a, duty hah em em pawh kan nei ngai ta lo. Mahse sorkar thuchhuak anga kan awm ve tho chu a ngai a, inkharkhip a puan ang te pawh phak ang tawk tawkin zawm ve hram hram kan tum a, chumi zawm tura thupek kengkawhtu ber chu kan ni. 

Thingtlang angah chuan kan hnapui ber thawh theih loh a nih a, kan chak lakna khar a nih chuan kan ṭam a ni deuh roh nghal mai a. Mahse mi inphal leh buh thar tam deuhte zarah chhuanchham em chu kan la awm lo. Hripui laka himna tur ngaihtuah a, chumi atana lo inven chu hri do pawla tel leh YMA zawn aṭang pawhin thil harsa a ni lutuk lo a. A buaithlak lai ber chu ei tur nei lo kan lo awm palh ang tih hlau reng renga indap kual ngai lai hi a ni. YMA leh kohhran ang zawngin kan ṭang rual a, ṭanpui ngai awm deuha kan hriatte ṭanpuiin buhfai te kan sem zauh zauh a. Khaw dangah a ni ve tho ang em ka hre lo a, kan khua bikah hi chuan ṭanpuina dawn loh hram duh hlir mai hi kan ni a, ṭanpuina kan pek dawn pawhin innawr luih deuh chiam chiam a ngai ṭhin. 

Chung ṭanpuina kan sema kan ṭanpui tel ve ziah, mahse la duh loa ṭang nasa thei ber pawl chu Pi Zapi hi a ni ang. Inkharkhip avangin hna a thawk mumal thei lo a, a sum hlawm hmuhna ve ber ni za inhlawhna lah chu lak tur a awm lo rei tawh ang reng si a, ṭanpui ngai ber pawlah kan dah lo thei ṭhin lo. Duh lo viau mah se. 

Kum 2021 a lo her chhuak a, kan hripui pawhin zia lam a pan deuh a nih hi tiin kohhranho pawh biak inah ngei kan inkhawm thei ta a. Mahse rei erawh a daih lo. A hma aia nasa zawk leh rapawm zawkin a lo thawk ṭha leh a, kan ram dinhmun pawh a ṭha viau tawh lo niin chanchintharah te kan hmu ṭhin. Nitin za telin an vei thar a, thihpui lah an awm chho ve ta zut mai. Kum thar, kum ṭha zawk kan lo beisei kha a thlawn mai a ni chho ta a nih hi. 

Sorkarin inkharkhip a puang thar leh a. Tlang kam aṭanga kan lo hriat danin Aizawlah phei chuan an strict zual viau a ni awm e. Keini khua erawh a hma ang em emin kan strict tawh lo a, khawpui kal chungchang velah lo phei chuan nunphung pangngai angreng takin kan nung thei. Kan inkhawm lo a, zirna in kan khar a, a ni deuh mai. Lo lam hna kan thawk reng tho a, keini hri do pawl pawhin kan khaw luh leh chhuah chungchang bak kan ngaihtuah ta vak lo. 

Hripui chanchin leh kan ram dinhmun ngaichangin chanchinthar kan thlir ve fo a. Thu lawmawm lam hriat tur a awm lo thei hle. Chanchin lungchhiatthlak tak tak kan thlir nitin laiin inṭanpui thawm hriat erawh a nuam kan ti ṭhin hle mai a. Thingtlang khaw hrang hrangin Aizawl veng ṭhenkhat ṭanpui nana chawhmeh eng ilo an pek thute phei chu ngaihthlak nuam tak a ni. 

Kan khua pawhin kan thlai neih ang angte thawh khawmin, ram chawhmehte zawn belh ila, i ṭanpui ve ang u kan ti a. YMAin kan rel zan phei chuan a reltute pawh kan hlim tlang. Chu ai mah chuan kan han puan chhuah a, khawtlang mipuiin min lo dawnsawn dan mawlh kha a ropuiin ka hria. Lo leh huan lama thlai awm ang ang kan thawh khawm a, tlangval ṭhenkhat chawhmeh zawnga lo vak chhuak lah an insulpel zut zut a. Chutiang chuan phak ang tawkin kan ṭang tlang a, hripui len hnua kan khaw boruak hlimawm ber ṭum a ni hial ang. 

Aizawl panpui kan tum ni chuan motor-ah hlangin kan buai khawp mai a. Aizawla kum eng emaw chen lo awm tawh leh la ṭhalai ber chu tiin hruaitu ten kal turin min ruat ve a. Kan inrem fel a, kan chhuah dawn mek lai chuan Pi Zapi khan dawrawn khat ṭana thil phur chung hian min lo ko a. Thlan tla hluam chungin a lo thleng a, a thil phurh chu kan lo lak thlaksak a. 

Pi Zapi dinhmun hretu vek kan ni a. Chutia a thlai thar a rawn thawh ve chu kan beisei loh lutuk a ni. Ṭawng mawi lo ni lo se heng a thlai thar hralhna bak hi sum thawh chhuahna dang a nei lem lo a. A intun nunna, a innghahna ve ber a ni. Han hralh se a ration lakna tur daih te chu a lei thei ngawi awm si. Engmah pawh sawi loa let leh mai a tum a, keiin rang deuhin ka va um a. 

"Ka pi, hengah te chuan i lo thawh ve a ngai hleinem. Hralh zawk la, sum pawh i mamawh zawk reng dawn asin."

"Vala, tih theih dang ka nei lo em zawk a. Kar hmasa lamah te khan lo puang lawk ni ula ka lo zuah ang a, a tam thei deuh tur a nia. Zingah ka va la sawk sawk a, tih tham lak tur pawh ka lo nei tawh lo."

"A nih leh kha, hei tal hi la rawh." tiin cheng 500 pek ka tum a.

"A ngai lo, a ngai lo. Hralh tura lo keng ka ni hleinem. Aizawlah, kan unaute, kan mihringpuite khuaran in tia mawni, ang khan an awm a. Hna pawh thawk thei loin, harsa takin an awm a, keini te chu kan dam ang a, kan nghei dawn hleinem. Tikhan tluang takin va kal rawh u." tiin a inher a, min kalsan ta daih a. Ka hrilh a hai ru angreng hle.

Tluang takin Aizawl kan thleng a, khawpui lun ve tak ṭhin kha a lo reh duk a! Kan va pek tur khawtlang hruaitu ten min lo hmuak a, an veng hall kawtah min lo dawngsawng a. Hetiang thingtlang chawhmeh ang mai mai hi khawpuiah chuan engah mah an lo ngaih ka ring lo ru kha a ni a, mahse lawm takin min lo dawngsawng a. Kan thilpek an han hmu leh, kan khaw chanchin kan han sawi te chuan patlingpui pui kha an hnuk a ulh a, an inhru ru zauh zauh a. Mihring hlim hmel hi hmuh a lo nuam ber a nih hi.

Kan chawhmeh va pek khawtlang hruaitute hlim hmel kha hmuhnawm ka ti a, ka en kham hleithei lo. Kan khuaa mite khan hmu ve se ka ti em em a, Pi Zapi mawlh khan han hmu ve se, Pathian fakna tur a chhar thar belh nasa dawn lutuk hian ka hria a.

Read More : Short Story - Pitar