Mizo Short Story : Noona

'Ranvulhte hian a vulhtu zia leh nungchang an la chhawng duh khawp' an ti a. Noona hian a tidik viauin ka hria. Noona chu ui a ni a, ka nungchang ang chiah chiah a nei ni maiin ka ngai ṭhin.

Aizawlah lehkhazira hostela ka awm laiin tuk khat chu kan hostel kawtah hian ui te tak te, bal zel hi a mei vai lah lah hian a lo ding a. A neituten an walk-pui a nih ringin ka pindan tukverh aṭangin ka thlir reng a. A dum a ni a, rawng varin a pawlh zauh bawk. Ui hmelṭha tak a ni. Eng emaw chen ka thlir hnuin min rawn hmu ve ni ngei tur a ni ka lam hawiin a rawn bauh leh ṭhat ṭhat ṭhin. Tukṭhuan ei dawn thleng pawha a neitu an lo la lan loh fo avang chuan a rilṭam ringin ka chaw ei bang hmet sawmin ka zuk pe a. Rei tak chaw ei tawh lo ang maiin a hap bawrh bawrh a, a lawm ve hle a ni ang a ei zawh hnu pawhin min ngheng talh talh a.

Luhsan ka tum pawhin mi zui zel si a, ka pindanah chuan ka pawm lut ta ngawt a. A neitute an lo lan mai ringin ka ngaichang deuh reng a, lo ngaihsak awm erawh ka hmu mai lo. A tukah chuan ui bo a awm leh awm loh ngaihvenin social media hrang hrang ka en kual a, hmuh tur a awm lo. Kan hostel ṭhenawm hnaivai ka zawt kual bawk a, chutiang nei awm reng reng an awm lo lehzel a. Duh vang reng ni loin ka enkawl ta a ni. 

Chu chu Noona nen kan intawn dan chu a ni. Ui chi ṭha leh lian chi ang hi a ni lo a. Zo ui tak tak ang kha ni berin ka hria. Ui fing leh huaisen tak a ni hran pawhin ka hre lo. Mahse, mi a ngaina em em a, zanah pawh ka bulah muin ka ban kham kher lo chuan a muhil duh ngai lo. Mak ve deuh chu bauh bengchheng a nei lo leh mi dang tana hnawksak tura a awm ngai lo kha a ni. Ka hostel awmpuite pawhin an hre lawk lo nghe nghe.

Hetih hunlai hi depression leh anxiety nasa tak avanga ka inenkawl lai a ni a. Mihring hrim hrim ka nel lo a, han chhuah vah leh ṭhian kawm ang chi ka ti ngai lo tluk a ni. Hostel-ah pawh pindanah ka inkhar hnawn chawt a, chaw ei tur vel bakin ka chhuak ngai lo. A tak takah chuan chaw eia chhuah pawh ka peih lo thei lutuk a, chaw ei chakna pawh ka nei lem lo. Mahse, Noona ei tur tal lak a ngai tiin ka dawh ve hram hram zel a. Amah vang hian chaw ka ei mumal phah viau a ni.

Tunhma kha chuan mu lawk loin dawhkan bulah ka ṭhu a, lehkha ka zir loh pawhin movie ka en vak vak a, a chang leh lehkha phekah eng eng emaw ka thai vak vak ṭhin. Chutiang chuan zing dar thum thleng thleng te ka awm a, tlaivar ṭhak ṭhak chang lah ka ngah. Noona awm hnuah erawh chuan ka ban kham kher loa a mut duh loh ṭhin avangin ka mut hma phah a, eng emaw chenahbnunphung pangngai ka neih phah viau.

Ui ka neih thu ka doctor rawn ka hrilh ṭum chuan a lawm khawp mai a. Mak ka ti zawk hial. 'Hetiang hi natna chi khat ve mai a ni a, danglam bik a ni hran lem lo. A danglamna erawh chu damdawi hmanga natna hrik thah emaw zai dam hmak emaw a theih ve loh hi a ni a. Damdawi hmanga inenkawl bakah kan nun dan leh kan chenpuite nena kan ṭanho a ngai a. Ranvulh hi enkawlna ṭha tak a nih bawk avangin ui i vulh chu a lawmawm hle mai. I natna pawh a chhawk viau thei ang,' tiin min hrilh nghe nghe.

Exam zawh hnuin kan khaw lam panin ka haw a. Noona pawh chu ka hruai ve ta zel a. Kan haw dawn zingah te phei chuan a lo phur ve em em a! Keimah zawk tak chu ka phur chiam thung lo. Ka chhungte ka ngai lo pawh a ni bik lo. Mahni khuaah chuan ṭhiante neuh neuh an lo lang ang a, kohhran vela inhmang tura beisei kha kan ni leh ngei awm bawk si a. Chutiang chu ka hreh a, ka huphurh a ni. Min kawm a, kohhran leh khawtlanga min hruai harh an tum hrim hrim tur kha chu a lawmawm ka ti lutuk a. Mahse, ka dinhmun nen chuan chutiang chu ka chak rih lo a, khawtlang nun pawna awm ka thlahlel rih zawk. Kohhran vel hi kan inhmuh khawm theihna remchang ber a nih ṭhin avangin, an zinga tel tura sawm ka ni leh ngei ang a, taksaa lang chhuak natna a nih loh avangin sawm nawn fo ka ni ang a; anmahni bula awm kha hrehawm ka ti tihna ni loin ka natna avang zawkin thaw reng siin thaw hlei thei lo, ipik taka ka awm tur ka huphurh lawk a ni ber mai. Kohhran leh khawtlanga inhman te hi a ṭhat em em rualin eng dinhmunah nge an din tih pawh ngaihtuah loa mi zawng zawng inbeisei chiam erawh hi chu a fuh loin ka hria.

Kan khua ka thleng a, ka damloh dan hretu ka nu leh pa, u leh naute chuan dam taka ka thleng chu min lo lawm hle mai a. Ka nu phei chuan ka inentir a, damdawi nen ka inenkawl tih a hriatin exan pawh exam loa haw mai turin min duh a. Mahse, ka hnial ve tlat avang erawh chuan min tilui ta bik lo. Mahni ka lo intihlum mai ang tih te an hlau niin ka hria pakhat pakhatin min lo be reng a. A chang chuan ning viau ṭhin mah ila, tu mah be peih lo a, ka mihringpuite lak aṭanga ka inlak hran vek lai pawha min la rawn pan ṭang ṭangtu chu an hlu em em a ni.

Ran ngaina tak chhungkua kan ni ngai lem lo a. Chutia Noona ka han hruai haw pawh chu mak an ti deuh hle. Mahse, ka hlimpuizia an hmuh chuan mi sawisel emaw, ning awm emaw pawhin an awm ngai lo. A rei hnu phei chuan keimah ang thoin an duat ve a, an lawm thiam ve lutuk. Noona hian ka zia ang chiah chiah a nei ve a, mihring reng reng hi a hlau em em tawp! Kan thlen tirhah phei chuan inah pawh a tlangnel lo em em a, ka bulah lo phei chuan a awm duh lo. Ka kalna apiangah min zui a, bathroom ka luh pawhin kawngka bulah min lo nghak tlat ṭhin.

Ran psychiatrist awm ve ta se, Noona hi han enkawl ve ta se, keimah ang maiin depression leh anxiety a neih ve hial ka ring! Ka hriat thiam dan berah chuan ka natna min lak ṭhensak a, min tuarpui ve a ni. Fe hawin rit taka thil kan phurh min lo chhawktu ang mai hi a ni. Keimahin zan phah viau mah ila amah khan a rih phah thung a. Ani chu enkawl ve vak ngaihna a awm si lo. Mahse, lungawi lo awmin a awm ngai lo. Noona chu ran mak tak a ni a, ran dang anga harh zawk zawk a ni lo. A nguai viau ti pawhin sawi ila a awm lo hran lo ang.

Tlai khat chu a thil ei a ngeih lo nge mawni a luak a luak mai a, chet pawh che peih loin ka bulah a bawk hle hle a. A hrehawm duh khawp mai. A tukah Vety hospital ka panpui nghal a, uluk taka min lo ensakin an jection a. Kar khat chhung jection chhunzawm tur a ni nghe nghe. Vety hospital awmna hi kan vang aṭang chuan a hla deuh hlek a, kea kal phak pawh a ni lo. Chutiang veng hlaa han kalpui te chu a khawngaihthlak zawk!

Jection hun a zawh dawn, ni khat chiah kalpui a ngaih tawhah chuan ka hritlang hlauh mai a, ka khua a sik bawk a. Noona chu kalpui thei ka nih tak loh avangin ka nauin a va hruai ta zawk a. Nachhawkna eia ka mu ka lo muhil sek a, ka phone riin min tiharh a. Ka han lak chuan mangang aw tak hian ka nau chuan, 'U, Noona kha a tlan phut a, Vety hospital thlang ram lamah a tlan thla daih,' a lo ti a. Khum aṭang chuan ka inperh tho rang hle.

Engtin nge Vety hospital ka pan pawh ka hre tawh lo. Ka va thlen chuan ka nau chu a lo ṭhu ngui bur a. 'U, min hau miah suh aw,' a lo ti mawlh mawlh a. A tlan liamna lam chu kan pan a, kan ko vak vak a. Hmuh tur erawh a awm lo. Khaw thim dawnah beidawng takin kan haw a, sawi tur a vang duh khawp mai. Ka ngui khawp mai a, chaw pawh ka ei hlei thei lo a ni ber. 'Zan rei hmain a lo haw ve mai ang,' tiin min hnem a. A lo haw hun nghakin sumhmunah ka vei chhen a, mut pawh ka tum lo. Zan a rei telh telh a, a lo lang mai si lo. Bei a dawng tawlh tawlh a.

A tuk khua a lo var a, ka unaute nen kan va zawng leh a. A hnuhma takngial pawh hmuh tur a awm si lo. Kan khaw whatdapp group hrang hrangah ka post a, hmu awm pawh an awm si lo. Chutiang chuan ni nga zet kan zawng a, zan tin a lo haw hun ka nghak ziah bawk. Hmuh tur a awm lo a, nghah chhuah hun a awm thei bawk hek lo.

Noona bo aṭangin thla thum zet a liam tawh a. Tunah chuan khawilai hmunah emaw a thi daih tawh ngei ang. Mahse, ka ngaihtuah leh duhthusamah chuan bal deuh hian kan inah a lo tlan luh nawlh ka la ring reng a. Chumi hun atan chuan a mutna ṭhin te pawh ka la dah bo duh lo a, rilṭam deuha a lo haw takin tiin a ei tur pawh ka ka inchhawp reng. A chang erawh chuan ramah a vak vak ang a, 'Min va han ngaihsak lo tak em,' te a ti rilru ang tiin ka ngaihtuah a, ka mittui a tla leh ringawt ṭhin. 

Ṭhenkhat tan chuan rilru leh thlarau pawh nei lo satliah a ni ngei ang a. Chutiang em ema sun tur a ni lo te pawh an ti mai thei le. Mahse, ka tan chuan mihring aia ka hnaih zawk, ka nat min chhawktu leh ka natna min hriat thiampuitu, min hmangaihtu leh ka ṭhian ṭha ber a ni a. A tel loin he ka natna hi ka hneh zo ang em ka hre lo.

Read More : Mizo Short Story - Pi Zapi