Skip to main content

Mizo Sermon : Phar Pual Pathianni

Image
By Ramlawt Dinpuia,
Isua chanchin kha chanchin ngaihnawm tak tak leh ngaihtuah zui vawng vawng tura khat a ni ber a. Mi hrang hrangin thiam tak takin an sawiin an ziak ṭhin. Isua chanchina a ngaihnawm ka tih lai ber leh Isua nuna ngaihzawnawm ber ka tih lai erawh chu mi hnuaihnung, chhumchhia leh daikil kara mi mai mai kianga hun a hmang ṭhin leh an tana a ding ṭhin lai kha a ni.

January thlaa Pathianni hnuhnung ber hi kan lawina kohhranah chuan 'Phar Pual Pathianni' tiin ni pawimawh bikah kan hmang a. Kum tin hmunpui lam aṭangin thupui thlan sa neiin, phar natna veite hnena rawngbawlna ṭulzia te, infuih thar a, incho tharna ang hun atan hman a ni ṭhin. Chu'ng huna sawi tam ber ni ṭhin chu Isua leia a len laia phar natna veite a veizia leh an hnena rawng a bawl nasatzia kha a ni.

A dik reng bawk a. Phar natna veite kha tihdam pawh a tidam tam a, an hnenah khan rawng a bawl mawlh mawlh mai a ni. Khang hunlai khan phar natna chu natna hlauhawm leh ṭihkhai a ni a, a vei tawh phei chu endawng leh thinhrik an hlawh nasa hle. Kan Lal Isua khan a hunlaia sakhaw lam zirtirtu dang angin ensan ve ta se la, ngaihsak bik lem lo se la... Tu mahin an dem hran ka ring lo. A tih awm hliah hliahah an ngai zawk ang.

Mahse Isua erawh chuan khawvelin a thlir dan tur lam kha a ngaihven lem lo a. Khawvelin mawi a tih leh tih dan phung a neih kha kal kanin mi thinhrik leh endawngte hnenah khan rawng a bawl tlat a ni.

Vawiinah hian kohhrana kan rawngbawlna te, ṭhalai pawl anga kan hmalakna leh mi malin kan vei zawngah te hian dinhmun hnuaihnung zawk leh chhe zawka dingte hi kan kal kan thauh thauh zel em? Isua leia rawng a bawl laia sakhaw hotu dang ang khan kan hnawlin kan kalsan ve mai ṭhin em?

Phar natna vei chu kan ramah hian rawngbawl chiamna tham kan nei lo a ni maithei e. Mahse Isua hunlaia phar natna vei ang maia dinhmun chhia, endawng tuar, thinhrik hlawh an awm nual lo maw? Chu'ng mite chu zahawm tak leh polite tak hian kan kal pel zut zut zel em? Kan kohhranah te hian mi lian leh hausa chin chauh thleng phakin kan lo nung viau tawh lo maw?

Chutiang rawngbawlna, dai pawn thleng phak lo, lamlian lehlam kai pha lo rawngbawlnaah chuan kan lo hlim rui viau tawh a ni lo maw? Kan zui Isua hian mi hniam ber, dinhmun chhe berte thleng phak turin a hniak zui tur min hnutchhiah a ni tih i hre thar leh teh ang u.

Mizo Sermon : Phar Pual Pathianni
Labels:

Comments

Post a Comment

Popular posts from this blog

Mizo Sermon : Kan Dam Chhan

By Ramlawt Dinpuia,
Hranghlui zaithiam C. Vansanga hla pakhat lar thar leh em em  a awm a, chu chu ‘Kan Damchhan’ tih kha a ni. Aw eng a’n nge maw Khuanu hian Hringnun hi a lo duan le? Thamral leh mai tur hian em ni le? Duh vang rengin kan piang si lo. tiin mihringa zawhna awm leh mihringte rilru tibuai fotu zawhna lian tak kha hla hmangin a rawn puang chhuak a. Engvangin nge he khawvelah hian ka lo pian chhuah ve ringawt a, engvangin nge he leiah hian ka lo awm ve? Ka nun hian eng nge awmzia a neih a, kan nun hian eng hlutna nge a neih ve le? Dam reng hian awmzia a nei meuh em ni? tih inzawtin nun awmze hriat lohna a hring a, chu chuan mahni nunna pawh hlut zo tawh lo turin min hnuk lut a, thalai tam tak an nunna titawpin mual an lo liam ta a ni. Vawiina la dam hram hram keini zingah pawh hian existential crisis an tihin a bawh buai eng emaw zat kan awm ngei ang. Nun hi eng nge maw a awmzia le? Nunna hi engvang nge maw a lo awm ve ringawt le? Thamral leh tur ringawt hian em ni kan lo awm ...
Post a Comment
Read more

Mizo Kutchhuak Poetry Bu

By Ramlawt Dinpuia,
Mahni puala hawrawp kan neih aṭanga vawiin thleng hian lehkhabu buatsaih leh tihchhuah lamah hma kan sawn ve zel a. Induhkhawp loh chang tam viau ṭhin mah se mahni tawkah chuan literature huangah hian thleng thui ve tawh tak kan ni. Kum tin lehkhabu chi hrang hrang pawh za chuang chuang a chhuak ve zut zut a, hmasawnna tih loh rual a ni lo. Literature ṭhuang hrang hrang pawh kan dai dar chho ve zel a, ṭhenkhatah phei chuan hausa ve tawh tak te pawh kan ni kan ti thei ang. Amaherawh chu kan lehkhabu chhuah dan hrang hrang thlir erawh chuan literature ze hrang hrang zinga upa ber pawl poetry lamah erawh chuan kan la pachhe angreng viau a, poetry hlang lehkhabu pawh kan la ngah lo hle. Kum 1989 aṭanga Mizo Academy of Letters-in kum tin an thlan ṭhin Book of the Yearah pawh kan mi thiam F. Lalzuithanga sawi danin top 10 thleng thei kum 2019 thleng khan 10 chauh a la awm. Chutih rual erawh chuan poetry bu hi a chhuak ve leh zauh zauh ṭhin a. Tunhnai chhoah phei chuan pun pawh a pung chak v...
7 comments
Read more

Mizo Sermon : A Hun Loa Rawngbawl

By Ramlawt Dinpuia,
Khawvelah kum 30 vel a cham chhunga chawimawi a hlawh ve awm chhun ropui taka Jerusalem an luh hnu khan Isua leh a zirtirte kha Bethani-ah an let leh a, zan an riak nghe nghe. A tukah, chu khua aṭanga an chhuah leh hnu chuan zing thingpui an in hman lo te pawh a ni maithei, Isua kha a rilṭam ta tlat a. Chutia rilṭam taka a awm lai chuan ral hla deuh takah theipui kung hnah hring dup mai hi a hmu a. "A rah ka hmu dah law maw," tiin a va pan a, mahse a rah reng reng a lo awm lo. Theipui rah hun a ni lo miau a! Khawvel thlirna aṭang chuan, "theipui rah hun pawh a ni lo a, a rah a lo awm lo hi a awm reng a nih hi" tih mai tur a ni a. Mahse Isua chuan theipui, a rah hun ni miah loa rah lo chu, a rah loh avangin a hau hlum hmak! Isua pawh hi a timak ve reng reng, a rah hun lai taka rah lo palh chu hau hlum pawh ni se a awm reng a, leilung kal danah hian a dem awm hauh lo ang. Mahse, a rah hun laia lo rah lo pawh ni lo, a rah hun ni miah loa rah lo kha a pawm awzawng lo! P...
Post a Comment
Read more