Mizo Sermon : Hruaitu Isua

Mizo zinga Mt. Everest lawn chhuak hmasa ber Pu David Zohmangaiha khan a tia lawm, khawvel tlang sang ber lawn chhuak tura an kawng zawhah khan an lawn chhohnaa puitu tur hrui thlun a ni a. Chu hrui chu zuiin tlang chhip an chuang kai ta ṭhin a ni. Kum tin tlang lawn mite zui tur hrui chu a thar thlun zel a ni a, kum hmasa lama an hrui hlui te pawh hmuh tur a la awm. Tlang lawn hun lai chuan khawvel ram hrang hrang aṭangin Mt. Everest lawn chhuah tum mi tam tak an kal khawm a, hrui pakhat chu an zui a. Traffic jam ang deuha a awm chang te a awm a ni awm e.

Chutia hrui pakhat zuia kal sawt hleihtheih loh ai chuan an kiang lawka hrui hlui chu vawna zui mai a chakawm viau ṭhin ang. Mahse hrui hlui chu la inthlung thla zur mah se a rinawm tawk tawh lo a, chumi zawhtute chu an chesual nge nge ṭhin. Sawt lo zawk angin lang mah se kha mi kuma hrui thar an thlun an zawh khan him takin an tum ram an thleng thei mai a, awlsam zawk zawnga hrui ni lo zawk vuantute erawh chu vur zam karah an zam ral ta mai ṭhin a ni.

Keini ang ho hi Mt. Everest lawn ve tur ni hauh lo mah ila kan nitin nunah hian tlang sang tak lawn chhuah hmabak kan ni vek a. Kawng awlsam leh nuam zawka lang ringawt zawh hi a lo fuh ber hauh lo tih zir tur kan hmu thei ang.

Kawng chin hria hruaitu chuan kan zawh tur leh kan zui tur min hnutchhiahsak a. Chu kawng chu a chang chuan a sawt lo viauin a lang ang a, a chang phei chuan kham ko karah te a kal ṭhin ang. Kal harsa khawpin a chang chuan a awm ang a, hei hi a dik lo a ni ang a, tih a awl rum rum chang pawh a tam ṭhin ang.

Kan chhehvelah kawng zal zawk leh zawh chakawm zawk a la thlur sung ang a, chung chu zawh ta ila kan nuamsain kan kal sawt zawk pawh a ni maithei. Mahse kan zawh tur kawng zawk a nih si loh avangin kan chetsual hun a la awm ngei ngei dawn si. Chuvang chuan kawng hruaitu ṭha berin kawng min kawh hmuh hi ring ngam ila, a mi hruaina chu harin khirh deuh mah se kan zui hram hram chuan a tawpah hnehna changin tlang chhip kan la chuang kai ngei ang.

Kan hringnun zin kawng kan zawh lai hian pen bona remchang leh kal penna tur chakawm tak tak awm fo mah se, kawng dik zawkah chuan hruaitu chuan min thlahthlam ngai lo ang a, kan dai tur leh kalna tur lo hmu lawk tawhtu chuan min hruai bo ngai lo ang. 

Read More : Mizo Sermon - Phar Pual Pathianni