Women Empowerment Te Mai Mai

Kum 1974 July ni 6-a din Mizo Hmeichhe Insuihkhawm Pawl(MHIP) hi a hming a\ang chuan Mizo hmeichhiate tana ding tur leh hmeichhe dinhmun chawisan a nih theihna tura beitu pawl ni awm tak a ni a, mahse tunhnaiah chuan hruaitu nih inchuh bawr vel bak an pel hleithei si lo a! Kan khawtlanga mi tam zawk hian hmeichhiate chu tlema hnuaihnung deuh tur leh chak lo zawk ni a, bet reng zawk tur niin kan ngai bawk. Chuvang chuan kan \awng ang maia kan hriat lar tawh hnu pawhin women empowerment te mai mai kan la ti tlat a ni.

Before you continue reading please follow this blog from the follow button in the right side >>>>>

Women Empowerment Chu

Dictionary-in empowerment a hrilhfiah dan chuan, ‘Mi tu emaw hnena thuneihna emaw thiltihtheihna emaw pekna’ tih leh ‘Mi tu emaw hnena thuneihna emaw thiltihtheihna emaw pekna tura kalkawng’ tihna a ni a. Women Empowerment tih a nih chuan hmeichhiate hnena thuneihna emaw thiltihtheihna emaw pekna leh chumi pe tura hmalakna tih angin a hrilhfiah theih ang.

Hmeichhiate chu thuneihna pek leh chuan an ngai em ni? tih zawhna a piang nghal a. Mizoteah chauh ni loin khawvel hnam tina hian hmeichhiate chu hnuaihnung zawk saa ngaihna a awm a, hmanlai a\ang rengin hmeichhiate chu an duh zawng tihtir phal loh an ni a, hmeichhiate chu mipa rawngbawl tura khuanu ruat an ni tlata ngaih a ni \hin.

Hmun tam takah hmeichhia chu sikul kaltir ve \ul tih lohna a awm a, khawtlang leh sakhuaah pawh hmun pawimawh chang ve thei lo tura rahbeh an ni a, ngaihdan sawi theihna neiah pawh ngaih an ni lo \hin reng a ni. Hna sang leh pawimawh chin thawk ve tlak loa ngaih an ni a, ram leh khawtlang hruaitu ni tura tling tawk lo leh chhungkuaah pawh thuthlukna siam tura rin an ni lo \hin.

Chutiang dinhmun hnuaihnung a\anga chhanchhuah leh, duhzawng leh ngaihdan sawi thei lo an nih \hinna hmuna duhzawng leh ngaihdan sawi theihtir ve te, chhiahhlawh ringawt anga an awmna laka zalentir leh rawngbawltu chauh ni tawh lo a thiltitheitu leh thutlukna pawimawh siam ve thei tura tihchak thar te a lo ngai ta a, chumi chu women empowerment tihin a tum leh kawh ber chu a ni ta a ni.

Maryann Tarantula, United Nation Committee chairman, Zonta International chuan, ‘Thuneihna pek(empowerment)in a kawh ber chu thuneihna pekte chu sorkar leh khawtlangin an mahni nun leh hmakhuaah thuneihna a neihtir ve hi a ni. Chumi thleng tur chuan mipa leh hmeichhiaiin rights leh zalenna, leh eng hna pawh thawk thei tura remchanna intluktlang an nei tur a ni’ a ti.

Women empowerment chu thil panga angin an sawi \hin a. Chungte chu hmeichhiaten anmahni kha an hlu ve tawk a ni tih an inhriatna; anmahni duhthlanna neih ve theihna chanvo; remchanna, duhsakna leh thil hrang hrang an chan ve theihna chanvo; inchhungkhur leh pawnlama an nuna thuneihna; khawtlang nunphung inher dan leh economy thlenga nghawng an neih ve theihna tihte hi a ni.

Read other article : US |henhrangtu Nula Chu

Pi Leh Pute Nunah

Mizo pi leh pute nunah khan hmeichhiate dinhmun hi a chhia a ni satliah mai lo a, dinhmun an nei lo hial zawk a ni a tih theih ang. ‘Hmeichhe thu thu ni suh, chakai sa sa ni suh’ tih \awngkam te, ‘Hmeichhe finin tuikhur ral a kai lo’ tih \awngkamte hian chu chu a tichiang viau.

Chhungkuaah hmeichhia leh mipa tihtur thliarhran a ni a, thil pawimawh chinah hmeichhiain ngaihdan an neih a thiang hek lo. Fanu chu ‘hralh’ tur a ni a, pasal pawh thlansak an ni \hin. Aia upa tirh an hnial ngai lo tih thuvawn neihna khawtlangah khan mipa naupangin hmeichhe tirh an zawm mawh khawp mai a, hmeichhe thuawih chu chhaih leh nuih an ni zawk \hin.

Khawtlang rorelnaah thu an nei pha lo a, khawtlang hmun pawimawh zawlbuk an chuankai phal a ni hek lo. Mipa nupui sun leh nupui nei lo chuan enhranna a tawh loh laiin hmeithai chu khawtlanga dinhmun hnuaihnung leh daikil kawmkara awm tur a ni!

Mizo pi leh pute nuna hmeichhe dinhmun chhiatzia sawi dawn chuan sawi tur tam tak a awm a, sawi kim sen a ni lo ang. Mahse pi leh pute kha dem viau tur an ni em tih erawh ngaihtuah tel a ngai a. An hunlaia an mamawh, pasal\ha, chak, hna hram thawk thei etc., chu awmnem zawk hmeichhiain an neih loh avangin an khawtlang nuna an dinhmun a hril a ni thei a. Tin, Mizote chauh ni lo, hnam tina awm a nih avangin tunhnua va dem let chiam chu a \ul hran kher lo ang.

Read other article : Politics A Inrawlh

Tuna Kan Khawtlang Nunah

Changkanna chak takin min nan hnu leh hmasawnna nasa tak kan chan ve tak hnu hian hmeichhe dinhmun chuan hma a sawn tawh khawp mai. Tunlaiah tak phei chuan kawng tinrengah a kal hmasa leh hmahruaitu an ni titih ta.

Mahse chhungkuaah hmeichhe thu a la nung lutuk lo tluang zel a, hna sang tak thawk tura rin ngam lohna leh ram leh khawtlang hruai tura la rin tawk lohna a la lian hle. Vawiin thlengin hmeichhia chu mualpho hma zawk leh dem hmasak an la ni a, thilsual tih inang rengah mipa kan ngaihzam theih viau laiin hmeichhia chu kan ngaidam mawh khawp. Hnamdang nupui pasal neih chungchangah pawh mipa chu sawi zui an ni ngai lem lo a, hmeichhia erawh hnam phatsantu title peka vawm zui luih luih an la ni \hin.

Kohhranah pawh pastor anga nemngheh theih an nihna a la rei lo a, upa ni tura tling tawka ngaih lah an ni hleithei lo. Kohhran \halai pawl hrang hrangah pawh hian hruaitu tak tak kan nihtir khat viau a, committee hrang hrangah pawh hmeichhe tam hlau tlat kan la ni bawk.

Zirna lamah chuan hmeichhiate hi a chungnung zawk an ni tlangpui tawh a, chutihrual chuan zirna hmunah pawh class representative chu mipa, hmeichhia chu assistant tur anga ngaih a la ni tho!

Tuna kan khawtlang nunah hian hmeichhe dinhmun a \hat tawh viau rualin \ha tawk tak chu a la ni lo a, empower ngai tawh lo phei chu la ni lo tak a ni.

Read other article : Mizo Movie Review - Damna Kim Chhartu Rintea

Women Empowerment A Ngai Reng Em?

Hmeichhe dinhmun chawisan hi a \ulna a awm kher em ni tih zawhna tam tak a awm a, he zawhna zawttu zingah hian hmeichhiate ngei ngei pawh tam tak an tel.

Khawtlangah hnuaihnung bik leh dinhmun chhe bik an awm reng chuan khawtlang hmasawnna a rual lo tihna a ni a, ram pawhin intluktlanna a awm loh chuan hmalam a pan thei tak tak hek lo. India ramah hian mi hausa tawntaw tam tak an awm a, khawvel ram hrang hrangah pawh hausa tawntaw tamna ber ram pakhat a ni. Mahse chu chuan ram hausa min nihtir lo a, ram rethei tak kan la ni tho. Mi tlemte hausakna khan ram hausaah min chantir thei lo a, kan zavaia kan hausak tlan hunah ram hausa kan ni zawk dawn a ni.

Chutiang chiah chuan mi \henkhat an changkan em em laia \henkhat an la berh viau chuan khawtlang changkang kan ni thei dawn lo a, \henkhat hmasawnna a zuanin zuang mah se \henkhat an hnungtawlh tlat si chuan ram hmasawn kan ni thei hek lo ang.

Kan hmeichhiate(mipa aia tam zawk) dinhmun a chhiat viau a, hnuaihnng taka an awm chhung chu mipa dinhmun chuan Sailo lal dinhmun hial tawng pha tawh mah se awmzia tak tak a awm dawn chuang lo a, a tam zawk an beh tlawk tlawk chhung chu hmalam pana kal tak tak a har viau ang. United Nations Organisation Secretary General hlui Kofi Annan khan, ‘Hmeichhiate dinhmun chawisan tluka hmasawnna hmanraw \angkai a awm lo’ a ti a ni.

Chuvang chuan women empowerment hi hmeichhe dinhmun chawisanna ringawt ni loin kan zavaia kan dinhmun chawisanna zawk a ni a. Women empowerment hi hmeichhiate din chhuahtir a, mipate rahbehtir lam ni loin, a ruala ke penna zawk leh a ruala khawvel intlansiak tawpna thlen tlan hi a ni zawk.

Read other article : Chanchinbuin Engnge An Sawi?