India rama infiamna discipline hrang hrang thuneitute chuan Infiamna lama chawimawina sang dawng thei tur nomination an chhawp chhuak hlawm a, football thuneitu sang All India Football Federation(AIFF) pawhin Arjuna Award dawng thei turin chhawp chhuakin, Mizo footballer lar Jeje Lalpekhlua chu heng chhawm chhuah zingah hian a vawi thumna atan telh a ni leh a. Ani bakah hian Sandesh Jhingan leh Bala Devi te chu chhawp chhuah an ni.
Arjuna Award hi India sorkara Ministry of Youth Affairs and Sports chuan infiamna lama hlawhtlingte chawimawi nan kum 1961 aṭang khan a sem ṭan a, cheng nuai 5 leh bronze statue keng telin kum 1961 khan mi paruk Saleem Durrani (Cricket), Gurucharan Singh Randhawa (Athletics), Sarabjeet Singh (Basketball), Manuel Aaron (Chess), Nandu Natekar (Badminton) leh LB D’souza (Boxing) te hnenah[Before you continue to read please follow this blog from the button in the ride side>>]
hlan hmasak ber a ni a, mi 700 lai hnenah pek a ni tawh. Hmeichhe zinga Arjuna Award dawng thei hmasa ber chu Meena Shah a ni a, kum 1962 khan Badminton aṭangin a dawng.
Arjuna Award dawng thei tura tehna hi tihdanglam a ni deuh reng a, tuna hman mekah hian a hma kum 4 chhungin infiammi chu international levelah tluang takin a che ṭha tur a ni a, chumi bakah chuan hruaitu ṭha, infiammi thinlung tak tak pu leh discipline ṭha tak nei a ni tur a ni bawk.
Read More : Women Empowerment Te Mai Mai
Arjuna Award hi Sports discipline hrang hrangah sem ṭhin a ni a, Arjuna Award dawn theihna sports discipline hi thlak leh tihdanglam fo niin kum 2001 aṭang khan world cup/Olympic Games / Asian Games / Commonwealth Games / World Cup / World Championship Disciplines hrang hrang leh Cricket bakah Indigenous Games leh pianphunga rualban lote infiamna huang-a infiamite hnenah chauh Award hi hlan a ni tawh a ni.
Arjuna Award dawng thei tur(nomination) siam turin Ministry of Youth Affairs and Sports chuan sports discipline hrang hranga national body te, Indian Olympic Association, State leh UT sorkar hnenah sawmna kumtin January emaw February thlaah emaw a pe chhuak ang a, anni hian an mahni sports discipline aṭangin nomination 3 ṭheuh April thla ral hmain an thehlut ang a, chung nomination thehluh aṭang chuan Supreme Court emaw High Court emaw judge hlui chaimanna hnuaia Selection Committee-in sports discipline hrang hranga Arjuna Award dawng tur chu a lo thlang chhuak dawn a ni.
Read More : Laldenga
Kum 2020-ah erawh hi chuan Covid-19 vanga lockdown vel avangin nomination thehluh theih hun hi pawhsei a ni.
Arjuna Award dawng tur nomination siam thei zingah hian sorkar department hnuaia Sports Control/Promotion Board hrang hrang, All India Police Sports Control Board, Army Sports Control Board, Railway Sports Promotion Board, Services Sports Control Board, Indian Navy Sports Control Board and Air Force Sports Control Board, Petroleum Sports Promotion Board, Air India Sports Promotion Board, SAIL Sports Promotion Board etc., te pawh sawm tel tur an ni a, anni hi chuan nomination 5 thleng an siam thei a ni.
Arjuna Award hi kum khatah Sports discipline pakhat aṭangin mi pakhat hnenah bak hlan loh tur tih ni mah se team sports ang chiah chuan pakhat ai tam hlan theih dan pawh a awm a, a vaiin kum khatah mi 15 aia tam hlan theih loh tih ni bawk chungin Commonwealth Games, Asian Games leh Olympic Games kumah chuan India mite chetṭhat dan azirin a aia tam pawh hlan theih a ni bawk.
Mak deuh chu Arjuna Award dawng tura nomination siamah hian a hma kuma dawng tawh pawh nominate nawn theih an nih laiin mi pakhat hnenah Award hi hlan nawn loh tur tih a ni leh hlauh bawk si!
Read More : Politics A Inrawlh
Arjuna Award leh Sports Award dang Rajiv Ghandhi Khel Ratna Award(India rama infiamna lam chawimawina sang ber), Dronacharya Award, Dhyan Chand Award, Rashtriya Khel Protsahan Puruskar, Tenzing Norgay National Adventure Award leh Maulana Abul Kalam Azad Trophy te chu India hockey khel thiam hmingthang Dhyan Chand piancham hriatrengna atana lawm ṭhin National Sports Day, August ni 29-ah India President-in a sem ṭhin a ni.
Arjuna Award dawng tur thlan dan leh nomination siam dan chungchangah hian inhnialna leh fair tawk loa ngaihna a awm fo ṭhin a, kuminah pawh hian Indian Shutter HS Prannoy chuan Commonwealth Games leh Asian Games vela medal lo la tawh ai chuan engmah la hlawh chhuak ve lote thlan ṭhin an nih thu sawiin a lungawi loh thu, 'He ram hi fiamthu mai a ni' tiin a lo sawi tawh a. Tin, India fast bowler che ṭha thei em em mai Jasprit Bumrah nominate a nih ve loh avangin BCCI lama hotu ṭhenkhat an lungawi loh thu te pawh chanchinthar luahtu a ni.
Read More : US Ṭhenhrangtu Nula Chu
Khawvelah hian eng chawimawina mah hi a fair fel fai famkim thlap e tih theih tur a awm lo a, ṭhenkhatin phu ngawih ngawiha an hriat kha ṭhenkhat chuan phu lo hul hual angin an lo ngai ve leh zel a! Mipui an thuhmun fo thei lo tih ang deuh kha a ni ber e.
Eng pawh nise nomination-a a vawi thumna atana lang Jeje Lalpekhlua hi Mizo zinga dawng hmasa ber ni turin Arjuna Award hi han dawng hlauh se tih hi kan duhthusam a nih ṭheuh a rinawm.
Comments
Post a Comment