Judai lal naupang tak, kum sawmthum leh kum nga mi chauh a nih laia lal ṭan Jehosaphata kha siam ṭhatna hna thawktu, reformer ropui tak a ni a. A lal tirh phata a hna hmasa ber chu Israel mite do tura indin ngheh a ni. Judai rama kulh nei khua zawng zawngah sipaite dahin ram ven himna lam siam ṭhat hna a thawk nghal mawlh mawlh a. Chu'ng a hnathawh avang chuan chhiah leh lawmman ṭha tak tak a dawng a, lal hausa tak a ni nghe nghe.
He siam ṭhat hna a thawhnaah hian tisa leh a lang thei lam siam ṭhat ringawt ngai pawimawh loin, sakhaw lam siam ṭhatna te, a mite rilru siam ṭhat hna pawh a thawk tel a, a ngaihpawimawh ber pakhat a ni. Khawpui ringawt ngaipawimawh loin thingtlang khaw hrang hrang pawh tuam zo tur siam ṭhat hna a thawk a, Judai ram khuatea mite zirtir turin a mi pawimawh tak takte pawh a tir chhuak mawlh mawlh a ni.
Chutianga siam ṭhatna hna nasa taka thawktu hnenah chuan Lalpa a awm a, a ram chu a kutah tihnghehin a awm ta reng bawk a ni. Kan baibulah phei chuan 'tu man Jehosaphata chu an do ngam lo va' tiin a inziak hial a ni.
Jehosaphata hi a lal ṭhutthleng ropui tak aṭang chauha rorel chi lal chu a ni lo. Jerusalema awm ni mah se, Beer-saba aṭanga Ephraim tlang ram thlengin a mite zingah a kal kual a, amah ngeiin Lalpa, an pi leh pute Pathian hnenah a mite chu a hruai kir leh hlawm a ni. Tunlai hun ang ni ta se, helicopter hmanga thlawk kual vut vut chi ni loin, a mite harsatna leh mamawhna a tak taka hmu turin a kal chilh thlap thlap ang a, amah ngeiin hna a thawk dawn tihna a ni.
Amah maia rorelna zawng zawng pum hmawm loin khaw tinah, Judai ram kulh nei khua zawng zawngahte chuan roreltute a dah a. Decentralization of power a lo practice daih tawh tihna!
A siam ṭhat hna thawh kawnga a ngaihpawimawh ber chu dik tak leh thianghlim taka thil tih a ni a, fair taka rorel a ni. Chu chu Pathian duh zawng tak a ni tih a hre chiang a, khaw tina roreltu a dahte pawh, 'Lalpa hlau ula, fimkhur takin ti rawh u; Lalpa kan Pathianah chuan khawlohna leh thlei bik neihna leh tham einate a awm lo a ni' tiin a fuih mawlh mawlh bawk.
He lal naupang tak hian Pathian duh zawng leh huat zawng a hre chiang a, chu chu a rorelna kaihruaitu berah a hmang ngam bawk. Lal ber a dik a, rorelna dik a thlan a, thlei bik neihna a duh loh a, tham lakna a hnawl tlat loh chuan a ram chu a lo thianghlim a, a ram chu siam ṭhatin a lo awm mai a ni.
Keini hi han inen ve ta ila. Kan politics tual zawlah te hian Pathian hming kan lam awl lo a. Kristian kan nihna pawh kan chapopui lek lek. Mahse, Lalpa Pathiana awm lo, khawlohna te, thlei bik neihna te, tham lakna te hi kan haw leh chuang si lo.
Ram rorelna lianpui chauh kan mitthla a ni maithei. Mahse a hniam ber, a bul ṭhut ber thleng hian inen ila. Lalpa rawng bawl inti, Pathian ṭih inti em em tho si hian kan va han inthlei nasa em. Kohhranah pawh ni se pa langsar leh hna sang deuh thawk kan welcome dan leh pa berh ve tak kan welcome dan chu a dang viau zel! Ṭhalaiah pawh faith promise thawh tam thei deuh leh thawh tur nei mang lo te hi kan inṭhen ru viau lo maw? Chu'ng zawng zawng chu kan rawngbawlna, kan Pathian hming chhala kan tih vek a la ni leh ta nghal a!
Siam thar lehna, harh thar lehna, siam ṭhat lehna duhin kan tuihal a. Thlarau thianghlim sawmin, kan ram tidam leh turin Pathian kan au a. Mahse Jehosaphata'n siam ṭhat lehna hna a thawh ang hian, siam thara kan awmna tur hian kan ti ve ngam meuh ang em le?
Kan Pathian duh dan leh ṭha tih dan hi kan duh dan leh nuam tihzawng ang anga kan kawih her theih a ni lo.
A lang thei leh kâ chauha kan lam ṭhin Pathian hi hlau tak tak ila, fimkhur taka tiin, Amahah chuan khawlohna te, thlei bik neihna te leh tham einate a awm lo tih hi i hre fiah thar leh teh ang u. Chutichuan, siam thar kan ni ang a, siam ṭhat kan ni ang a, kan ram a dam leh ang.
Read More : Mizo Sermon - A Hun Loa Rawngbawl
Comments
Post a Comment