Poetry Hmanga Sum Lakluh Dan

Mahni tui zawng tak leh nuam tih zawng tak ti chunga sum thawh chhuah hi mi tam zawk duhthusam a ni ngei ang. An tuichilh tak thil hmanga miin pawisa an han hailut ruih ruih mai hi an lawmpui awm em em rualin an thikawm rum rum ṭhin bawk a. Tunah hian poetry lo tuipui em em, lo ziak a, lo vahvaihpui ve ngar ngar ṭhinte tana thu lawmawm ni thei tur, poetry ziah hmanga sum lakluh dan sawi kan tum dawn a ni.

 

Poetry hi art form zawng zawng zingah sum leh pai ang zawnga hlawk lo ber pawl a nih a rinawm a, khawvela poet lar tak tak te pawh sum lak luh tak tak nana hmang chu sawi tur bar an awm lo a ni. Tin, poetry hrim hrim hi art thi mek(dying art) ti-a sawi te a lo ni ṭhin bawk nen, hausakpui har tak a ni te pawh a ni maithei. Chutih rual chuan kawng awm lo hulhual a ni lo a, khawvel changkanna sang zel leh internet khawvela kan zuan luh tak hnu phei hi chuan hawi zau a, dap chipchiar deuh chuan tih theih dan a awm ve zel a ni.

1. Lehkhabu Chhuah: Lehkhabu chhiar melh melh peih kan tlem tak duak duak lai hian lehkhabu han chhuah ve ringawt chu hlawkna aia hlohna tur hlir a nih hmel a. Mi nawlpui chhiar ṭhat peih loh poetry bu chhuah phei chu ngamawm loh tak tur a ni. Mahse beidawng nghal ngawt lo ila.

Lehkhabu chhiar peih an tlem, lehkhabu hralh a har kan tih mek lai hian lehkhabu chhuak thar apiang hmaih ngai lo leh lehkhabu chhuak leh tur chang ngat ngat ṭhin eng emaw zat an la awm a. Chu’ng mite hnen thleng phak tura lehkhabu buatsaih theih a nih chuan hlep awm tur khawpin lehkhabu hi a chhuah theih a ni. 

He’ng kan sawi bakah hian Mizo ṭawng lehkhabu chhiar vak lo, sap ṭawng lehkhabu chu ngaina viau lawi si leh a leina tura inseng hreh lo tak tak kan ṭhalai zingah hian tam tak an awm a, poetry bu kan tih ang pawh chhiar nasa tak tak an awm(Mizo ṭhalai zingah pawh Lang Leav leh Rupi Kaur poetry bu lei eng emaw zat an awm a ni). Mizo ṭawng lehkhabu an chhiar ngai loh chhan lian ber chu an duh zawng leh tui tih zawng an hmuh loh vang a ni ber a. An duh zawng tak chhawpsak an nih chuan market ṭha awm thei tur a ni.

Lehkhabu chhiar nana hun nei lo kan in tih tawh hlawm em em lai hian hun heh lo leh lehkhabu dang anga chhiar ngut ngut ngai ni lo poetry bu chu sum lakluh nana hman tlak tak tur a ni.

Tin, lehkhabu kan hriat sa pangngai ang ni lo deuh e-book kan tih ang zawng te pawh hian kawng a inhawng zau viau a, lehkhabu tak keu aia mobile phone keu nasa zawk kan nihna laiah hian buaipui tham a ni ngei ang.

[Mizo ṭawng lehkhabu chhuah dan chungchang hi ziah leh kan tum dawn nia.]

2. Journal/Magazine-a Thehluh: Mizo ṭawng bikah chuan hei hi chu tih ngaihna a awm vak lo a. Sap ṭawng thiam leh sap ṭawnga ziak ṭhin kan nih erawh chuan khawvelah journal leh magazine hrang hrang, poetry thehluh aṭanga sum hlawh theihna eng emaw zat a awm. Poetry va thehluh ringawt khan pawisa min lo pe nghal dawn chu a ni lo a, kan thehluh kha an editor rualin an lo en ang a, pawm tlak an lo tih chuan poetry pakhatah ringawt pawh US Dollar 200 dawn dawn te a hlawh theih thung a ni. 

A hnuai ami hi khawvel puma pawisa hlawh theihna poetry journal lar zual a ni a, tarlan loh pawh eng emaw zat a awm bawk.

(i) The Sun: Poetry pakhatah Rs 75,00 aṭanga Rs 15,000 inkar an pe ṭhin. 

(ii) Poetry Foundation: An magazine-a poetry an chhuah man tlar khat zelah Rs 750 an pe ṭhin a ni.

(iii) Rattle: An ni hian poetry pakhatah Rs 3,750 aṭanga Rs 7,500 an pe ṭhin a, kum khata poetry ṭha bera thlan chuan Rs 75,000 lawmman an dawng bawk ṭhin.    

(iv) Alaska Quarterly Review: An ni hnen aṭang hian poetry pakhatah Rs 750 aṭanga Rs 3,750 inkar a dawn theih.

(v) Epoch: An ni pawh hian poetry pakhatah Rs 3,750 zel an pe ṭhin a ni.

Mizo ṭawng chauha ziak ṭhin tan heng journal hoah hian thehluh ve theih loh angah ngai tur a ni lo a. Mizo ṭawnga ziah kha sap ṭawnga lehlin hnuah thehluh ve leh mai tur a ni. Mahniin kan letling thiam lo a nih pawhin thiam tak tak eng emaw zat an awm a, tum tak tak chuan kawng a awm zel a ni.

3. You Tube Channel Siam: You tube hi social media dang ang thoin kan zingah a mikhual tawh lo a. Mi tam takin sum lakluh nan an hmang mek. You tube channel siam a, i poetry chhiar te i dah a, subscriber leh viewer i ngah hnu chuan zaithiam te leh you tuber tam tak angin sum lakluh nan i hmang thei dawn a ni.

4. Blog Siam: Mizo zingah pawh blog siam a, mahni thuziak leh kutchhuak dah ṭhin eng emaw zat an awm tawh a, khawvel pum thlir phei chuan blogger hausa tak tak sawi tur tam tak an awm a ni. You Tube ang thoin blog tlawhtu an tam dan a zirin sum lakluh theih a ni a, tin blog tlawhtu an tam hnu phei chuan mahni pualin dawr leh thil hrang hrang fakna atan pawh a siam theih dawn a, taimak chuan sum lakluhna ṭha tak a ni thei dawn a ni.

5. Thildang: Kan sawi bakah khian poetry hmanga sum lakluh theih dan kawng tam tak a la awm ṭeuh a. Mi tana ziahsak ang chi te pawhin sum a lakluh theih a, miin an inneih anniversary-ah an kawppuite thumawi tak thawn duh ang ta se khang tana lo ziahsak te, Valentine’s day-a ngaihzawngte thawn tur lo ziahsak ang chi te, an chhungte thi tawh thlan lunga ziah tur emaw banga tar tur ang chi emaw te pawh demand a awm ve reng zel a ni.

He’ng bakah hian poet ṭhenkhat chuan company ang deuh te an siam a, T-Shirt, no etc., siamin an kutchhuak an chhu kai a, sumdawn nan tak tak an hmang a ni.

Poetry hmanga sum lakluh theih dan hrang hrang kan sawi ta nual a, kan sawi bak leh mi la tih ngai loh pawh tih tur tam tak a awm ngei ang. Mahse pawisa thawhchhuah dan kan sawi mawlh mawlh nain pawisa hmuh nan ngawr ngawr ang zawnga kan ziak a nih erawh chuan kan art hlutna a tlahniam deuh maithei a, kan kutchhuak pawh zirlaibua telh a ni har deuh maithei.

Eng pawh chu ni se, sum lakluh nan kan hmang emaw hmang lo emaw, lang theiah kan hlawkpui viau lo emaw pawh ni se kan rilrua awm te puang chhuakin kan thinlung thawnthu chu i ziak chhuah mawlh mawlh ang u. 

Khawvel hi changkang tawh viauin, hmasawnna pawh sang takah thleng tawh mah se art-ah bawk mihring hi kan kir leh ṭhin si a.